Şer vila bi heme herême
Serekê DYA Trumpî daxilbîyayîşê xo yê hêrişan (ke nameyê "operasyonê şerî yê pîlî" da cî) tesdîq kerd û veng da şarê Îranî ke hukmatî bivisnê xo dest. Îranî zî baregehê DYA’yî yê herême kerdî amanc û wina şer nêzdeyê 10 welatan rê vila bi. Mabenê Îran û Îsraîlî de Hezîrana 2025î de 12 rojî şer qewimîyabi
Îsraîl û DYA ewro serê sibayî vera Îranî hêrişê hewayî dayî destpêkerdene. Serekê DYA’yî Donald Trumpî veng da Muhafizanê Şoreşî ke teslîm bibê. Trumpî şarê Îranî rê zî wina veng da: “Saeta xoserîya şima ameya. Wexto ke karê ma qedîya, hukmatê xo bivisnê xo dest.” Îranî, baregehanê DYA’yî yê herême rê hêrişî dayî destpêkerdene û wina şer Erebistanê Siûdî, Iraq, Kuweyt, Bahreyn, Mîrîtîyê Ereban ê Yewbîyayeyî û Qeterî rê zî vila bi. DYA û Îsraîlî seba grûbê girêdayeyê Îranî tayê amancê Lubnan û Iraqî zî dayî piro.
13 Hezîrana 2025î de mabenê Îran û Îsraîlî de ke DYA zî pê hêrişanê hewayî daxil bîyabî, 12 rojî şer qewimîyabi. Nê şerî ra dima mabenê nê hîrê welatan de alozîye dewam kerde. 28 Kanûna 2025î ra nata Îran de bi seyan şaristanan de çalakîyê şarî dest pêkerdîbî. Vera çalakîyanê cîyakerdişê rejîmî hêrişê Îranî tûndî bîyî û goreyê tayê çimeyan tewr tay 30 hezar kesî wefat kerdî, 50 hezar ra zêde kesî zî ameyî tepiştene. Çalakîyan ra dima Serekê DYA’yî Donald Trumpî mesajê "hetkarîye rayîr de ya" daye çalakgeran û DYA hêzê xo yê leşkerî herême de zêde kerd. Trumpî vizêr şanî de eşkera kerd ke o nê rewşî ra qayîl nîyo. Ewro sibayî zî Îsraîl û DYA vera Îranî hêrişî dayî destpêkerdene.
Avêrşîyayîşê saetan:
15.38 – Îtalya tespît kerd ke baregehê înan ameyo pirodayene: Fuzeyêkê Îranî Kuweyt de isabetê baregehêkê leşkerî kerdo ke 300 leşkerê Îtalya tede yê.
15.34 – Macronî ra NY’î rê vengdayîş: Serekkomarê Fransa Emmanuel Macronî dîyar kerd ke no şer asayîşê mîyanneteweyî rê xeter o û wina veng da Konseya Asayîşî ya NY’î ke bi lez bêra pêser.
15.17 – NY ra şermezarkerdiş: Komîserê Berzî yê Heqanê Merdiman yê BM Volker Turkî hêrişî şermezar kerdî û vat: "Sîvîlî reyna bedelê şeran danê. Fuzeyî cîyayîyan safî nêkenê."
14.48 – Hewlêr binê hêrişî de yo: Hêrişanê DYA û Îsraîlî ra dima Îranî hêrişê fuzeyî kerdî. Paytextê Herêma Kurdîstanî ya Federe Hewlêr zî ame pirodayene. Balyozxaneyê DYA’yî zî amancan mîyan de yo.
14.22 – Verfekê Artêşa Îranî: Verfek Ebulfazl Şekarciyî vat: “Ma do derbêk wina bidê Amerîka û Îsraîlî ra ke do poşman bibê. Kar hema neweyo.”
13.51 – Xebera mergî ya verênî ameyî: Şaristanê Mînabî de yew dibistanê keynekan ame pirodayene û 5 wendekarî wefat kerdî. BAE de zî kesêk merd.
13.02 – Şer bi vila heme herême: Îranî baregehê DYA yê Suudî Arabistan, Bahreyn, Qeter, Kuweyt û BAE kerdî armanc. Îranî dîyar kerd ke kamcîn welat ra teyareyê DYA û Îsraîlî wurzê, do o welat bibo amanc.
12.40 – Artêşa Îsraîlî: Îran de bi desan baregehê leşkerî ameyî pirodayene.
12.12 – Netanyahuyî veng da şarê Îranî: Serekwezîrê Îsraîlî Netanyahu dîyar kerd ke înan operasyon dayo destpêkerdene û veng da şarî ke vera rejîmî sere wedarê.
