‘Nasnameyê ma nêeşkenê bikerê malzemeyo sîyasî!’

Komeleya Kultur û Paştdayîşî ya Dêrsimijanê Menemenî bi eşkerayîya xo ya nuştekîye, vera babetkerdişê şarê Dêrsimî û nasnameyê elewîyîye yê mîyanê pêrodayîşê hêzî yê sîyasetî û hesabanê zereyî rê nêrazîbîyayîşê xo mojna. Taybetî nîqaşanê dormeyê CHP’yî de ziwanê ke vera Dêrsimî yenê xebitnayîş ra nêrehetîya xo ameye ziwan û ame vatene ke no tewir "newe ra weşkerdişê ziwanê înkar û îmhayo seserrî" yo.

Eşkerayîya ke hetê îdareyê komeleye ra ameye kerdene de, ame vîrardiş ke şarê Dêrsimî tarîx de tim vera sîyasetanê cîyakerdîş û asîmîlasyonî xover dayo û nê îfadeyî ca girewtî:

“Şarê Dêrsimî ke bi seserran o nê erdan de vera qetlîaman, sîyasetanê asîmîlasyonî û her tewir cîyakerdîşî xover dano, qet yew merkezê sîyasî rê nê meze yo, nê zî biza guneyî yo! Êyê ke semedê rantê sîyasî dejê cografyaya Dêrsimî kurenê û estbîyayîşê bawerîya elewîyan nêvînenê, do vera xo de îradeyêko xurt ê şarî û têkoşînêko rêxistinkerde bivînê.”

“No hêriş vera têkoşînê demokrasîye yo”

Komele ard ziwan ke nê rexneyî tenya vera nasnameyanê dîyarkerdeyan nîyê; yê vera heme hêzanê averşîyayeyan ê ke welat de têkoşînê têduştîye, azadî û demokrasîyêko raştikên danê û îfade kerd ke hêzê serdestî seba ke îqtîdarê xo bipawê, wazenê şaran pîya bidê qir kerdene.

Eşkerayîye bi nê mesajî qedîyaye: “La çîyêko ke înan kerd vîrî ra esto: Ma tîya yê; bi nasname, bawerî û kulturê xo estê; qet yew ca zî nêşinê!”