Mîrasê Xoverdayîşî yê 20 Serran: Festîvala Zîlane

Festîvala Cinîyan a Zîlane ya 20ine, bi şîarê "Nika wextê cinîyan o, cinîyî cîwîyayîşêko azad weşnenê" 20ê Hezîrane de bajarê Dortmundî yê Almanya de yena viraştene. Festîvala ke 2004 de dest pêkerde, ewro bîya wareyêko enternasyonal yê paştgirîya cinîyan. Verfeka YJK-E Kezban Dogan bale ante muhîmîya festîvale ser û vat: "Na festîvale tenya kombîyayîşêkê kulturî nîyo, eynî wext de yew nasnameyêko sîyasî yo. Na raywanîya azadîye ya 20 serran, mîrasê xoverdayîşî yê Sakîne, Bêrîtan û Zîlanan o."

Ziwanê şarê kurdî ameyo qedexekerdene

Kezban Dogane Rojnameyê Yenî Ozgur Polîtîkayî rê qisey kerd û vist vîrî ke kulturê xo rê wayîrvejîyayîş zî yew xoverdayîş o û vat: "Şarê kurdî şaro ke ziwanê ci ameyo qedexekerdene û nasnameyê ci înkar bîyo, coka yew lawike vatene û kincanê neteweyîyan dayene xo ra zî tewirêkê azadîye yo." Kezban Dogane vat ke ciwanî bi hîşmendîyêka sîyasî tewrê festîvale benê û felsefeya "Jin Jîyan Azadî" nê wextî de xeylê ciwanan rê bîya çimeyê îlhameyî û cinîyî bi keda xo komelêko demokratîk afernayê,"

Kezban Dogane wina domna: "Ma wazenê ke bi nê şîarî rolê cinîyan mojnê ra. Sîstem wazeno cinîyan asîmîle bikero, la cinîyî sînoran şiknenê û paştî danê yewbînan."

Bernameyê Festîvale

Hanî, Eylül Nazlier, Eylem Kulahçı, Pîa Def Ensemble û Helbest Arî do vejîyê dika ser. Domanan rê xebata "Zarok Ma" û pêşangehê hunermendanê cinîyan zî do bibê. Festîvale saete 09:00 de, adresa "Remydamm Victor-Toyka (P1/P2) 44139 Dortmund" de dest pêkena. Kezban Dogane heme cinîyî dawet kerdî: "Bêrê, ma pîya cîwîyayîşêko azad biweşnê."