Karkerên Veguherîna Bermahiyan dixwazin werin naskirin

Li Tirkiye û Kurdistanê rewşa xebatkar û kedkaran her ku diçe zehmettir dibe. Taybetî şert û mercên kar, bidestxistina heqdestê xwe û mafên xwe yên bingehîn gelek caran dibe sedema nerazîbûn û binpêkirina mafan. Yek jî karê herî zor û pirsgirêk karê veguherîna bermahiyan e. Li Stenbolê bi hezaran kes vî karî debara xwe dikin. Karker, bi erebeya çekçekê li kolanên Stenbolê bi saetan digerin û kaxez, plastîk û poşetan hatine avêtin kom dikin. Gelek karker zêdetirî 10 saetan dixebitin. Karkerên ku li Stenbolê dixebitin, gelemperî ji bajarên bakurê Kurdistanê koçî Stenbolê kirine û ji bo debara xwe û malbata xwe bikin dest bi karê komkirina berheman kirine. Karkeran, ji bo ku mafê xwe biparêzin Komeleya Karkerên Veguherîna Bermahiyan avakirine. Endamê komeleyê Mustafa Ay têkildarî karê veguherîna bermahiyan û daxwazên wan ên li qada 1ê Gulanê ji ajansa me re axivî.

‘Karê me gelek zehmet e’

Mustafa Ay destnîşan kir ku di sala 2002an ji navçeya Sêwregê ya Rihayê koçî Stenbolê kiriye û got: “Hevalên me jî ji salên 90î koçî Stenbolê kirine û dest bi karê veguherîna bermahiyan kirine. Hevalên me gelemperî ji Amed, Sêwreg û Çewligê ne. Karê me gelek zexmet e. Kesên ku hatin Stenbolê ji bo debara xwe bikin dest bi kare komkirina kaxez û plastîkê kirin. Gelemperî ciwan vî karî dikin û ew jî ji ber neçariyê dikin. Emrê me li koçberiyê derbas dibe. Me jî dixwest li welatê xwe bixebitin, lê belê ji ber nebûna kar me koçî vir kir. Hevalên me ji bo debara malbatên xwe li vir dixebitin.”

‘Em herî kêm 12 saet dixebitin’

Di berdeama axaftina xwe de Mustafa Ay anî ziman ku saeta karê komkirinê tune ye û da zanîn ku ew gelemperî serê sibehê dest bi kar dikin. Mustafa Ay destnîşan kir ku ew rojê herî kêm 12 saet dixebitin û wiha dirêjî da axaftina xwe: “Ev saet gelek caran ji 12an jî dibore. Li navçeya Kadikoyê hevalên me şev dixebitin. Ji ber ku li wir şev zêdetir kar dibe. Li navçeya Sultanbeylî û Umraniyeyê jî em roj dixebitin. Carna dibe ku hevalên me 17 saet jî dixebitin, ji ber ku di vî karî de tu çiqas zêde tişt kom bikî ewqas zêde pere qezanç dikî. Hevalên me bi erebeyên çekçekê bi saetan li kolanên bajar digerin. Em gelemperî tiştên veguheradinê yên weke kaxez, plastîk, hêsin, poşet hwd. kom dikin.”

‘Em dixwazin werin naskirin’

Mustafa Ay diyar kir ku wê Komeleya Karkerên Veguherîna Bermahiyan di 1ê Gulanê de ji bo mafê xwe li qadan bin û axaftina xwe wiha bi dawî kir: “ Ji 1ê Gulanê re tê gotin ‘Cejna karkeran’, lê belê gelek hevalên me di roja 1ê Gulanê de jî dixebitin. Ev çend sal in em wekî komele tevli 1ê Gulanê dibin. Em ê îsal li qadan bang bikin û bibêjin ‘em dixwazin werin naskirin.’ Em hezaran kes in û kolanan in. Herkes li kolanan me dibîne. Lê em dibêjin ‘divê pergal jî me bibîne.’ Pergal li dijî me çawê xwe digire. Lê belê bila pergal bizanê ku em hene û em li kolanan in. Em karekî zehmet dikin, gelek kes jî feyde ji karê me digire. 1ê Gulanê em ê ji bo tevahî karkeran li qadan bin û ji bo Gulîstan Doku, Rojîn Kabaîşê edaletê bixwazin. Em li dijî bêedaletiyê disekinin.”