'Ganî heme hetê kurdan nê têkoşînê Rayber Apoyî rê bibê paştgir'
Hemserekê Konseya Rayberî ya KCK'yî Cemîl Bayik û Fermandarê NPG'î Murat Karayilan seba Kombîyayîşê Pêroyî ya 24. ya KNK'yî peyamêk erşawit. Peyam de bale antîye muhîmîya yewîya neteweyî ya kurdan, rewşa krîtîk a Rojhilata Mîyanêne û rolê KNK'yî yê newe ra awankerdişî ser.
Demêko ke herêma ma de Şerê Cîhanî yê Hîrêyin dewam keno û pergalê 100 serrî yeno munaqeşekerdene, emser Kombîyayîşê Pêroyî ya KNK'yî kom bena. Hemberê nê tehlukeyan û firsendan de yewîya demokratîk a kurdan qederê şaranê ma dîyar kena. Nê prosesî de KNK'yî rê wezîfeyê tarîxîyî kewenê war û şertê yewîya xeta sîyasîyê kurdan ferz beno.
Mesajê Hemserekê Konseya Rayberîya KCK’yî Cemîl Bayik û Fermandarê NPG'î Murat Karayilanî wina yo:
“Ma sere de Dîwanê Kombîyayîşê Pêroyî û heme endamanê komelî bi rûmet silam kenê. Xebatanê şima yê fîrazan de ma seba şima serkewtiş wazenê. Seba ke şima komelê pêroyî ya parîne de endamîya ma qebul kerde, ma sipasîya xo pêşkêş kenê. Çi heyf, semedanê ke yenê zanayene ra, ma nêeşkenê komelê pêroyî de amade bibê. La ganî komelê pêroyî ya hûrmetkare bizana ke ma sey endamê na sazgeha neteweyî û fîraze, çi wezîfe bikewo ma mil, ma amade yê.
Dîwanê hêjaye û endamê erjîyayeyî;
Ewro herêma ma Rojhilata Mîyanêne de Şerê Cîhanî yê 3. esto. Armancê nê şerî, herême newe ra dîzaynkerdiş o. Wazenê ke gorê menfeatê sermayeya xorînî û asayîşê Îsraîlî, herême newe ra dîzayn bikerê. Sîstemê 100 serrî yo ke serê letekerdiş û înkarkerdeyîşê Kurdistanî de awan bibî, ewro munaqeşe beno. Taybetî şerê mîyanê Îran û Amerîka-Îsraîlî de yo ke esto, seba pêro şarê Îranî û şarê ma yê Rojhilatê Kurdistanî firsendanê neweyan awan keno. Pêkerdişê mîyanê 6 rêxistinanê Rojhilatî gamêka ercîyayî ya, la aseno ke pratîk de hema yewbîyayîş pêk nêamayo. Ma hêvî kenê ke biba pêkerdişêka raştikêne. Çi beno wa bibo, şarê ma yê Rojhilatê Kurdistanî do rolêkê muhîmî kay bikero.
Rojawanê Kurdistanî de zî heman rewşe esta. Pêkerdişê 29ê Çeleyî yê ke badê komplo û hêrişê 6ê Çeleyê 2026î ameyo viraştene, mîyanê xo de tayê destkewteyanê Şoreşê Rojawanî paweno. La tehlukeyî û hewldayîşê vengvetişê peymane hîna dewam kenê. Aseno ke Sûrîyê de hema kevirî nêrûniştê. Başûrê Kurdistanî de zî weçînayîş ra dima hema hukmat nêawam bîyo û xeterîyê serê destkewteyanê kurdan ê pêroyîyan dewam kenê.
Na çarçewe de muhîmîya ravêrdeyê Bakurê Kurdistanî seba heme Kurdistanî zaf zêde ya. Mîyanê serranê 2015 û 2025î de dewleta Tirkîye bi paştdayîşê NATO’yî û tayê hetanê kurdan, waşt Têgêrayîşê Azadîye bi zor çin bikero. Şer zaf giran vîyart, la xoverdayîşê tarîxî yê Îmralî û yê gerîlayan ver dewleta tirkan bi çekan nêresaye armancê xo. Nika ravêrdeyêkê çareserîye rojev de yo û xebatê Rayber Apoyî zaf muhîm ê. Rayber Apo wazeno ke herême de seba kurdan cayêk awan bikero. Heta ke kurdî mîyanê yasaya Komara Tirkîye de ca nêgîrê û zîhnîyeta qirkerdişî nêvurîyê, seba çareserîye çîyêk nêaseno. Coka ganî heme hetê kurdan nê têkoşînê Rayber Apoyî rê bibê paştgir.
Embazê Hêjayî;
Serdemê ke ma tede yê, serdemêkê asayî nîyo. Seba ke firsendê tarîxîyî dest ra nêşê, şarê ma yê azad biciwo û yewîya demokratîke xurt biba, stratejîyêka hembare zaf lazim a. Nê esasî ser o, ewro rolê KNK'yî hîna zaf vejîyeno vernî. Seba netîceyanê şênberan, KNK de zî ganî rojevê newe ra awankerdişî biyarîyo ca. Dîplomasîya neteweyî û yewkerdişê hêzanê pawitişî armancê ma yê gird ê. La ewro 3 çîyê lezbezî estê ke ganî ma biyarê rojev:
Awankerdişê konferansêkê neteweyî: Seba nê, ganî KNK hîna hîra bixebitîyo.
Stratejîyêka kurdan a hembare: Ganî her kes bi hişmendîyêka demokratîke tebigêro û hewldayîşanê yewîye xira nêkero.
Pêjirnayîşê belgeyêkê neteweyî: Mîyanê rêxistinanê kurdan de qebulkerdişê belgeyêkê neteweyî yo ke şerê zereyî û sîxûrîyî qedexe keno. Ganî tu kes nêbo sebebê rijîyayîşê gonîya kurdan.
Endamê Ezîzî;
Rêbazanê xebate yê KNK'yî de vurîyayîşî hewce yê. KNK ganî tenya bi partîyanê sîyasîyan nê, bi sazgehanê sîvîlan û bi pêro çapemenîya kurdî zî bido û bigîro. Her parçeyê Kurdistanî de buroyê an zî nûnerê cîyayî bibê û nê karî zereyê welatî de bêrê meşnayene. Taybetî komîsyonê ziwan, kultur, ekolojî û azadîya cinîyan hîna aktîf bibê. Têkoşînê vera asîmîlasyonî de ganî heme cîhan de kampanyayî bêrê meşnayene.
Ma bawer ê ke komelê hêjaye nê babetan ser o nîqaşanê girîngan kena û seba yewîya demokratîke ya kurdan do rola xo bîyara ca. Biryarê ke do bêrê girewtene, teqez do netîceyanê xurtan bîyarê. Bi nê hîs û bawerîye, ma seba şima pêro endamanê komelî reyna silamê xo yê german erşawenê, xebatanê şima yê fîrazan de bi zerrî û can serkewtiş wazenê.
Silam û rûmetanê şoreşgêrîyî...
02.06.2026
CEMÎL BAYIK & MURAD KARAYILAN”
