Foza Yusif va gerek bi lezabez weçînitişî bêrê betalkerdene

Rojawan de weçînitişê Parlamentoyê Sûrîya ke 24ê gulane de ameyî kerdene, dormeyê sîyasîyî yê kurdan de bîyî sebebê munaqeşeyî. Partîya Yewîya Demokratîke û xeylê partîyan proses boykot kerd.

Weçînitişê bimunaqeşeyî ke herêmanê kurdan ê Rojawanî de ameyî kerdene bîyî sebebê nêrazîbîyayîşanê girdan. Rojawan de no weçînitiş sey tayînkerdişê hukmatê demkî yeno hesibnayene. Xora dîmenanê merkezanê weçînitişî de zî yeno vînayene tewrbîyayîş sinordar o, atmosferê weçînitişî çîn o.

PYD û xeylê partîyanê sîyasîyan ê kurdan seba ke têna 4 kursîyî dîyayî kurdan weçînitişî boykot kerdî. Vera nê Meclîsê Kurdan ê Neteweyî yê Sûrîya tewrbîyayîşê vîjnayîşî qebul kerd û di endamê xo şawitî parlamento. Di kursîyê bînî nameyanê xoseran rê mendî.

Endama Konseya Hemserekîya PYD’yî Foza Yusifa ke Nûmedya24î rê qisey kerd, vat sebebê qerarê boykotî temsîlîya kurdan kêm ame tepiştene. Foza Yusif vat: “Çîyo ke hukmatê Şamî ewro ferz keno, raştîya estbîyayîşê şarê kurdî yê Sûrîya temsîl nêkeno. Mekanizmaya weçînitişî demokratik nêbi. Bitaybetî herêma Cizre de teberê îradeyê şarî de namzedî ameyî bewlîkerdene. Herinda îradeyê şarî de Şamî endamê meslîcî goreyê xo vîjnayî. Coka tewrbîyayîşê weçînitişî yeno manaya qebulkerdişê mekanizmaya antîdemokratîke. Ez reyna vana vera na polîtîkaya antîdemokratîke qerarê ma yê boykotî qerarêko raşt bi. Gerek Kongreya Neteweyî ke pêro şaranê Sûrîye temsîl kena bêro kerdene. Gerek weçînitişê heme Sûrîye û herêmanê kurdan lezabez bêrê betalkerdene û herinda ci de mekanîzmaya demokratîke bêro ardene. O wext ma eşkenê qala temsîlê raştî yê kurdan bikerê.”