Dayika Aştiyê Munîbe Koç bi girseyî spartin axê

Dayika Aştiyê Munîbe Koç ku ji ber pênçeşera mîdeyê li Nexweşxaneya Bajêr a Etlîkê ya Enqereyê dihat dermankirin, di 14ê hezîranê de koça dawî kir. Cenazeyê Dayika Aştiyê Munîbe Koç piştî nimêja nîvro li Goristana Karşiyaka ya Enqereyê bi girseyî spartin axê. Malbat û hezkiriyên Munîbe Koç û rêxistinên siyasî û civakî û gelek welatî tevlî merasima cenazeyê bûn.

Ji bo aştî û azadiyê têkoşîya

Dayika Aştiyê Munîbe Koç di sala 1956an de li Erdexanê di gundê Mucucê de ji dayik bû. Jiyana wê di koçberî û nav têkoşîna azadî û aştiyê de derbas bû. Dayik û xwişka du şehîdan e. Di sala 1996an de tev li nav têkoşîna Meclîsa Dayikên Aştiyê bû û heta dawiya jiyana xwe di nav hemû çalakî û hewldanên ji bo aştiyê de cihê xwe girt. Herî dawî di rêveberiya DBPê de cih girt.