Veysî Aktaşî ra seba Kongreya Şingalî mesaj: Waştişê xoserîye meseleya estbîyayîşî ya

Endamê Sekreteryaya Îmraliyî Veysî Aktaşî, mesajê xo yê ke seba Kongreya 6. ya Asayî ya Meclîsê Xoserîya Demokratîke ya Şingalî (MXŞD) rê erşawitî de, wina vat: "Waştişê xoserîye meseleya asayîş û estbîyayîşî ya. Yewbîyayîş, xopawitiş û rêxistinbîyayîş do bi xo reyde azadîye bîyarê." Aktaşî kongre fîraz kerde û derheqê têkoşînê komela êzîdîyan ê estbîyayîş û azadîye de ercnayîşî kerdî.

Veysî Aktaşî da vîrî kerdene ke Fermanê 2014î de bi hêrişê çeteyanê DAIŞ’î bi hezaran êzîdîyî ameyî qetilkerdene û tepiştene, cinîyî dîyayî koletîye û sehezaran kesî koç kerd. Ey vat: "Nê fermanî ra dima teberê HPG û YPG’yî de çewî êzîdîyî nêpawitî. Coka pawitişê cewherî bi ferz. Yewîyê Xoverdayîşê Şingalî (YBŞ) û Yewîyê Cinîyan ê Şingalî (YJŞ) tenya nêbîyî hêzêko leşkerî, eynî wext de seba komela êzîdîyan bîyî garantîya pawitişî. Na xeta ke cinîyan tede rolêko pîl kay kerd, seba têdûştîya zayendî zî modelêko newe afernayo."Dewamê mesajê xo de Aktaşî dîyar kerd ke averşîyayîşo tewr girîng ê dima fermanî, xurtbîyayîşê îradeyê xoyîdarekerdişî bi û wina domna: "Meclîs û komunê ke ronîyayî, sîstemêkê îdareyê xoserî ardî meydan. Wexto ke komela êzîdîyî rastê qirkerdişanê tarîxîyan yena, no waştişê xoserîye zî sey meseleya asayîşî û estbîyayîşî vîjêno. Modelo ke Şingal de awan beno; azadîya cinîyan, cuye ekolojîke û aborîya kolektîfe xo rê keno hîm. Xelisîyayîşê şarê êzîdîyî pawitişê hêzanê teberî de nîyo, averberdişê rêxistina xosere de yo. Şingal sey Sîmurgî xo, newe ra afernayo."

'Yewbîyayîş hêz aferneno'

Aktaşî derheqê tifaqa komela êzîdîyan de zî qisey kerd û wina vat: "Seke wextê fermanî de çar perçeyê Kurdîstanî seba Şingalî yew bîyî, ewro zî ganî ma vengê yewbîyayîşî berz bikerê. Yewîye tenya pîyabîyayîş nîyo; armanc, îrade û hişmendîyêka hempara ya ameyoxî ya. Yewîye hêz aferneno, ma krîzan ra xelisneno. Komelêko parçekerde nêeşkeno waştişanê xo bi xurtî bîyaro ziwan. Yewbîyayîş, xopawitiş û rêxistinbîyayîş do ma bireso azadîye. Senî ke dima Şingalî ma Kobanî de bîyî yew, ganî ewro zî ma eynî ruhî bimojnê."

Aktaşî wina vat: "Seba komela êzîdîyan azadîye manaya qebulkerdişê nasnameyê kolektîfî, ziwan, kultur û îradeyî ya. Cayo ke tede azadîye çin bo, nasname û bawerîye zî binê tehlukeyî de yê. Azadîye, xoyîdarekerdişê şarî yo. Ganî şima bi hêzanê xo yê pawitişî, erdê xo ser o wayîrê qerarî bê. Eke wina bo ma eşkenê qala azadîya raşte bikerê."

'Azadîya Abdullah Ocalanî'

Mesajê xo de Veysî Aktaşî bale ante azadîya fîzîkîye ya Abdullah Ocalanî ser zî û mesajê xo wina qedîna: "Xelisîyayîş û azadîya şaranê Rojhelatê Mîyanênî û kurdan girêdayîya azadîya Rayberê Şarê Kurdî Abdullah Ocalanî ya. Rayber Apoyî polîtîkayê qirkerdişî û komployî pûç kerdî. Coka, bêrê ma pêro bibê yew û zey çemêkê cuye ver bi azadîye bimeşê."