Vengdayîşê Federasyonê Elewîyanê Ereban ê Ewropa: "Îneyo Sîya" û Qirkerdişê 7ê Adare nînê vîrakerdene!

Eşkerayîya Federasyonê Elewîyanê Ereban ê Ewropa de ame îfadekerdene ke 7ê Adare, tarîxê Elewîyanê ke Sûrîye de cuyenê de sey “Rojêka Sîyaye” ca girewto. Verba nê qirkerdişan veng dîya komelê mîyanneteweyî ke wa bêveng nêmano û bêvengîya xo bişikno.

Eşkerayîye de ame vîrardene ke a roje hoparloranê camîyan ra seba Qirkerdişê Elewîyan “vengdayîşê cîhadî” ame kerdene û grubanê radîkal û fanatîkan verba dewanê Elewîyan hêrişê qirkerdişî kerdî û wina ame vatêne: “Grubî bi çekanê xo kewtî mîyanê dewanê Elewîyan, dewî veşnayî; domanî, cinîyî, kalî û xortî, kam ke rastê înan ame, kiştî. Nê hêrişan bi rojan dewam kerd. Peyê xo de birînê xorinî û welatêko wêran verada.”

Federasyonî eşkera kerd ke kesê ke qirkerdiş de cuya xo vînî kerda bi hurmet ardî vîr û wina ame domnayêne: “Nê çîyê ke qewimîyayê, ma qetî nînan vîrî ra nêkenê û ma do nêdê vîrîrakerdene. Serre û nêm o ke elewîyê ke qeraxê Sûrîye de cuyenê, mîyanê yew trajedîyêka girane de yê. Goreyê agahîyanê ke yenê girewtene, mîyanê nê wextî de bi des hezaran elewîyan cuya xo vînî kerda. Zaf kesan zî bar kerdo, welatê xo terk kerdo û bîyê koçber. Kesê ke pey de mendê, ê zî binê tade û zextî de yê. Hetê ekonomî û ramitişê weşîya xo ra zî binê tehlûkeyî de yê. Komelê elewîyan tarîx de zaf reyan rastê qirkerdişan ameyo. Qirkerdişê Dêrsim, Mereş, Çorum, Sîvas û Gazîyî hêma zî vîrê ma de taze yê.”