Televîzyon rîskê demansî zêdîneno
Cigêrayîşêkê neweyî mojna ra ke wexto ke merdim ronişeno, mezgê xo senî xebitneno, no weşîya mezgî rê dîrekt tesîr keno. Zaf temaşekerdişê televîzyonî rîskê demansî zêdîneno, la fealîyetê zîhnîyî yê sey wendişî mezgî pawenê.
Cigêrayîşêkê neweyî vet werte ke heme aktîvîteyê bêhereketî weşîya mezgî ser o eynî tesîrî nêkenê. Goreyê zanyaran, wextê roniştişî ra zêdêr, wextê roniştişî de mezg senî yeno xebitnayene, no muhîm o. Bi taybetî zaf temaşekerdişê televîzyonî rîskê demansî zêdîneno; la wendiş yan zî fealîyetê zîhnîyî yê ke serê mase de aktîf yenê kerdene, mezgî pawenê.
Xebata cigêrayîşî hetê cigêrayoxanê Enstîtuya Karolinska û Unîversîteya Deakinî ra ameye kerdene û kovara American Journal of Preventive Medicine de ameye weşanayene. Çarçeweya xebate de 20 hezarî ra zêdêr kesê pîlî 19 serrî ameyî teqîpkerdene.
Cigêrayoxan vat ke wextê roniştişê pasîfî de zî eke tay fealîyetê zîhnîyî yê aktîfî bêrê kerdene, nê weşîya mezgî ser o tesîro pozîtîf kenê. Zanyaran reyna da zanayene ke, pîya bi hereketanê fîzîkîyan, bi taybetî bi ravîyartişê serran (pîlbîyayîş) aktîvîteyê zîhnîyî zaf muhîm ê.
