Şerê DYA-Îsraîl û Îranî dewam keno; bîlançoya mergan giran bena
Şerê mabênê DYA-Îsraîl û Îranî de roja 8ine ya. Hêrişê hewayî yê DYA û Îsraîlî vera paytext Tehranî û xeylê şaristananê Îranî dewam kenê. Lubnan de zî pêkewtişî estê. Nê mabên de Îranî eşkera kerd ke ê do hêrişanê xo yê vera cîranan bi şert vinderdarnê. Bîlançoya mergan zî roj bi roj giran bena
Şero ke 28ê Sibate de bi bombardumanê DYA-Îsraîlî yê vera Îranî û verpersê Îranî yê vera baregehanê DYA û Îsraîlî dest pêkerd, kewt roja xo ya 8ine. DYA û Îsraîl tewr zaf nuqtayanê leşkerîyan kenê hedef.
Goreyê Heyva Sûre ya Îranî, 28ê Sibate ra nata Îran de 1.332 kesî merdî. Lubnan de 130, Îsraîl de 11, ÎAE de 3, Kuweyt de 4, Îraq de 2, Bahreyn de 1 û Umman de 1 kes merd. CENTCOM’î vat ke 6 leşkerê DYA merdê.
11.22 – ÎSRAÎL LUBNAN BOMBA KENO: VIZÊR RA NATA 49 KESÊ BÎNÎ MERDÎ
Hêrişanê hewayî yê Îsraîlî yê vizêr ra nata yê vera cayanê cîya cîyayan ê Lubnanî de 39 kesî merdî, xeylê kesî birîndar bîyî. Ajansê NNA’yî vat ke teyareyê Îsraîlî taybetî rojhelat, başûr û herêma Dahiye ya Beyrutî kerdî hedef.
11.08 – PEZEŞKÎYANÎ VAT DO BI ŞERT HÊRIŞAN BIVINDERDARNÊ
Serekkomarê Îranî Pezeşkîyanî welatanê cîranan ra uzrê xo waşt û vat ke eke vera înan hêriş nêbo, ê do hêrişanê vera cîranan bidê vinderdartene.
10.20 – LUBNAN DE 300 HEZAR KESÎ CAYÊ XO RA BÎYÎ
Konseya Multecîyan a Norwecî vat ke 4 rojan de Lubnan de 300.000 kesî cayê xo ra bîyî. Wezaretê Weşîye yê Lubnanî dîyar kerd ke hêrişanê Îsraîlî de 123 kesî merdî, 683 kesî birîndar bîyî.
10.18 – DYA ZERARÊ KORFEZÎ GÊNA XO SER
USIDC’î eşkera kerd ke Waşîngton do seba bawerîya naklîyecîyanê neftî herêma Korfezî de vîndîbîyayîşanê heta 20 mîlyar dolaran rê reasurans bido.
10.12 – YEWÎYA EREBAN "LEZABEZ" KOM BENA
AFP vat ke wezîrê teberî yê Yewîya Ereban seba "hêrişanê Îranî" yewşemeyî kombîyayîşêko lezabez virazê.
10.10 – EREBISTANÊ SIÛDÎ: HESABO XELET MEKERÊ
Wezîrê Pawitişî yê Erebistanê Siûdî Xalid bîn Selmanî Îran rê vat ke "hesabo xelet mekerê". Wezaretî vera baregeha DYA û zevîya neftî de verê hêrişanê fuzeyan û ÎHA’yan girewto.
10.00 – TEHRAN BI 80 TEYAREYAN REYNA AME BOMBEBARANKERDENE
DYA û Îsraîlî Tehran ser o pêlêko newe yê hêrişan da destpêkerdene. Artêşa Îsraîlî vat ke 80 ra zêde teyareyê şerî ca girewto. Unîversîteya Îmam Huseyînî û yew kampuso binerdî ameyî hedefkerdene.
09.50 – ÎAE VERÊ FUZEYANÊ ÎRANÎ GIREWT
Wezaretê Pawitişî yê ÎAE’yî vat ke sîstemanê pawitişê hewayî verê fuzeyanê balîstîkî girewt, teyareyan zî ÎHA û fuzeyê seyîrî pûç kerdî.
08.33 – DYA RA SÎLEHAN Ê "LEZABEZ" RÊ TESDÎQ
Wezaretê Karanê Teberî yê DYA’yî vat ke seba Îsraîlî rotişê 151,8 mîlyon dolaran ê muhîmmatî ameyo eyakerdene.
08.23- TRUMPÎ ŞÎRKETAN REYDE PÊVÎNAYÎŞ KERD
Serekê DYA Donald Trump bi şîrketanê sîlehanî reyde ameyo têhet. Trumpî wina vato: "Şîrketî qebul kerdî ke viraştişê sîlehano averşîyaye 4 qat zêde bikerê."
08.15 – PUTÎN Û PEZEŞKÎYANÎ PÊVÎNAYÎŞ KERD
Putîn û Pezeşkîyanî telefon de qisey kerd. Putînî seba mergan serweşîye waşte û vat ganî şer bêro vinderdartene û dîplomasî bêro xebitnayene.
08.05 – EREBISTANÊ SIÛDÎ VERÊ ÎHAYAN GIREWT
Wezaretê Pawitişî yê Erebistanê Siûdî eşkera kerd ke serê sibayî verê 4 ÎHA û fuzeyanê balîstîkan ê ke ameyêne eştene girewto.
08.00 – LUBNAN DE PÊKEWTIŞÎ DEWAM KENÊ
Hêrişê Îsraîlî yê Lubnanî dewam kenê. Wezaretê Weşîye yê Lubnanî eşkera kerd ke 3 kesê bînî zî merdî û 16 kesî birîndar bîyî.
