Pervîn Buldan: Abdullah Ocalan do seba 8ê Adare mesajêk bierşawo
Endama Heyetê Îmrali yê DEM Partîye Pervîn Buldane vat ke Rayberê Şarê Kurdî Abdullah Ocalan do çarçeweya 8ê Adare Roja Cinîyan a Dinya de mesajêkê neweyî bierşawo
Endama Heyetê Îmrali yê Partîya Têduştîye û Demokrasî yê Şaran (DEM Partîye) Pervîn Buldane tewrê programê JIN TV’yî bîye.
Pervîn Buldane wina vat: “Ma sey heyetî derheqê prosesî de dîyê wezîrê neweyî zîyaret kerdî. Her di wezîrî zî wezîrê ke derheqê prosesî de wayîrê wezîfe û berpirsîyarîyê. Yew Wezîrê Karanê Zereyî yo, yew zî Wezîrê Edaletî yo. Ma Wezîrê Edaletî reyde qanûno ke do bivejîyo qisey kerd, ma musayî ke amadekarîyê înan est ê, amadekarîyê ma zî est ê. Ma qerar da ke înan îstîşare bikerî û verê cû ke bêrê komîsyon, ma bêrî têhet. Ma da zanayene ke roşanî ra dima bêrî têhet û amadekarîya verê komîsyonî, verê cû ke şirê komîsyon ganî bêra îstîşarekerdene. Înan zî vat ke ê nê rîyî ra germ ewnîyenê. Roşanî ra dima no qanûn do şiro komîsyon, komîsyon de raporêk amade beno û na mesele sey goşt û esteyî bîye eşkera. Pêşnûmeyêk ma a ya ke, ame Komîsyonê Edaletî û ma fikirîyenê ke peynîya nîsane, destpêkê gulane de bêro desteyê pêroyî. Ma Wezîrê Karanê Zereyî reyde meseleya qeyûmî qisey kerde. Ma pawitişên xo yê derheqê peyserantêgêrayîşê qeyûmanê tayînkerdeyan û îradeyê şarî de resnayî ci. Bêguman no qerar teyna qerarêk nîyo ke yew wezîr bido, qerarêk o ke îradeyê sîyasî bido, coka ma wezîfe û berpirsîyarîyê înan vîrî fînayî. Ma derheqê pêvînayîşê her di wezîran de rayaumûmîye rê agahdarîye daye, pawitiş û vîr û rayê xo resnayî înan.”
Birêz Ocalan do beyannameyêk bierşawo
Pervîn Buldan nê çîyî ardî ziwan: “Pêvînayîşê xo yê tewr peyên ma 16ê Sibate de Birêz Ocalanî reyde kerd. O pêvînayîş de ma waşt ke 8ê Adare ser o vîr û rayê ey bigêrî, la ey da zanayene ke mîyanê amadekarîyêka hîna derg de yo, beyannameyêk amade keno, beyannameyêkê cinîyan o ke mîyanê xarîteya rayîrî de yo, amade keno. Ey vat ez do nê verê 8ê Adare de biresna. Di rojî dima ma pawenê ke no beyanname, bi hawayo ke mîtîngan de bêro wendene, bikiwo destê ma. Ma zanê ke Birêz Ocalan meseleya cinîyan ser o xebatanê xeylê giran keno. Têkoşînê têduştîye û azadîye yê cinîyan rê, vera tahakkumê serê cinîyan, vera qetlîamanê cinîyan de ganî merdim wayîrê senî nêzdîbîyayîşêk bo, derheqê înan de pêvînayîşan de vîr û rayî û pêşnîyazê ey est bîyî. Ma pawenê ke no do 8ê Adare rê mîyanê xarîteya rayîrî de beyannameyêk bo. Çaxê ke resayo destê ma, ma do mîtîngan de, meydanan de nê mesajî biwanî. Birêz Ocalanî 8ê Adare yê pêro cinîyanê dinya firaz kerd. Bi nê beyannameyî do mesajanê muhîman bido."
