Parlamentoyê Iraqî kom beno: Grûbê Şiîyan û YNK tewrê ci benê, PDK vera cîyo
Parlamentoyê Iraqî, seba ke serekkomaro newe weçîno kom beno. Grûbê şiîyan û partîyê kurdan eşkera kerd ke ê do tewrê rûniştişê xususî yê seba weçînayîşî bibê. Labelê PDK’yo ke binê serekîya Mesud Barzanî de yo, nê rûniştişê xususî qebul nêkeno û do tewrê rûniştişî nêbo
Parlamentoyê Iraqî ewro seba weçînayîşê serekkomarî rûniştişêko xususî virazeno. Grûbê şiîyan ê zey Îtîfaqê Awekerdiş û Averşîyayîşî, Hêzê Dewleta Neteweyî, Sadiqûn, Teqedum û Babilî bi hawayêko resmî eşkera kerd ke ê do tewrê kombîyayîşî bibê.
Weçînayîş do bibo, netîce nêpaweyîyena
Mîyanê fraksîyonanê kurdan ra zî Yewîya Nîştimanperweranê Kurdîstanî (YNK), Têgêrayîşê Helwestî, Yewîya Îslamî ya Kurdîstanî (Yekgirtû), Neslo Newe (Newey Nû) û Komelê Edaletî (Dadgerî) do tewrê kombîyayîşî bibê. Labelê Partîya Demokrat a Kurdîstanî (PDK) do tewrê kombîyayîşî nêba.
Hûmara endamanê Parlamentoyê Iraqî 329 a. Turo yewin de kamcîn namzedê serekkomarîyî 220 rayan bigêro, o weçînîyeno. Eke wina nêbo reydayîş maneno turo diyin; na rewşe de namzedo ke tewr zaf rayan bigêro, beno serekkomaro bîn yê Iraqî.
