NY: 3 serran de hezarî ra vêşêr kedkarê hetkarîya merdimanîye ameyî kiştene
Koordînatorê NY’yî Tom Fletcherî dîyar kerd ke hîrê serranê peyênan de heme dinya de hezarî ra vêşêr kedkarê hetkarîya merdimanîye cuya xo ra bîyî.
Koordînatorê Karê Merdimaneyî yê Neteweyanê Yewbîyayeyan (NY) Tom Fletcherî dîyar kerd ke hîrê serranê peyênan de heme dinya de hezarî ra vêşêr kedkarê hetkarîya merdimanîye cuya xo ra bîyî. Fletcherî no tablo sey "zêdebîyayîşêko tesadufî nîyo, rijîyayîşê mekanîzmeyanê pawitişî yo" erjna.
Eşkerayîye de ke Konseya Emnîyetî ya NY’yî rê ame pêşkêşkerdene, ame vatene ke tena serra 2025î de 21 welatan de tewr kêmî 326 xebatkarê hetkarîya merdimanîye ameyî kiştene. Hîrê serranê peyênan de hûmara înanê ke cuya xo ra bîyî 1.010î ra vêşêr a. Fletcherî îzeh kerd ke na hûmare nisbetê hîrê serranê verênan nêzdîyê hîrê qatî zêde bîya. Giranîya merdişan waranê şerî de bîyê û vindîbîyayîşê tewr giranî Gazze û Vakurê Şerîa de bîyî. Sewbîna Sudan, Başûrê Sudanî, Ukrayna û Komara Demokratîke ya Kongo de zî zaf xebatkarê hetkarîye cuya xo ra bîyî.
Fletcherî vat ke êyê ke cuya xo ra bîyê; werd, awe, derman û hetkarîya stargehî resnayêne şarî û bîyî hedef. Nê kesî konvoyanê hetkarîye yê eşkera nîşankerde de bîyî û rayedaran reyde koordîne bîyî, ameyî kiştene. Zaf hêrişî hetê dewletanê endamê NY’yî ra ameyî kerdene. Gazze de Îsraîlî xebatê NY’yî û sazgehê komelê sîvîlî yê mîyanteweyîyan sînordar kerdî, Bi se hezaran merdimî bê hetkarî mendî, Ukrayna de seba hêrişanê dronan sazgehê hetkarî mecbûr mendî ke xeta cebheyî ra apey biancîyê û Yemen de desan xebatkarê NY û komelê sîvîlî bikeyfî tepîşte yê. Fletcher peynîye de venga Konseya Emnîyetî yê NY’yî da ke qerarê ke derheqê pawitişê xebatkaranê hetkarî de ameyî girewtene, bêrê caardene.
