‘Mi Sakîne newe fam kerde’: Pêvînayîşê Zeynepe Cansiz o peyên weşanîya

Maya ronayoxanê PKK’î ra Sakîne Cansiz, Zeynepe Cansiz 14ê nîsane de nêweşxaneyo ke tede tedawî dîyêne de cuya xo vîndî kerde. Bi wesîleyê wefatê Cansize, pêvînayîşê aye yo peyên o ke mîyanê kitabê nuştoxe Gulçîçeke Gunel Tekin o ke Weşanxaneyê Belge ra vejîyayo "Rayîrê Azadîye Ser o Mayê Kurdî - Mayê Kurdî Qisey Kenê" (Dayikên Kurdan ên li ser Rêya Azadiyê - Dayikên Kurdan Qalê Dikin) de ca gêno, weşanîya.

Sakîne Cansiz 9ê çeleyê 2013î de Parîs de Fîdane Dogan û Leyla Şaylemez reyde bi suîkastêk ameye kiştene. Cansiza ke wayîra otobîyografîya hîrê cildan a "Cuya mi tim şer bîye" (Jiyana min timî şer bû) bîye, nameyanê pêşengan ê têgêrayîşê cinîyan ê kurdan ra yewe bîye.

Zeynepe Cansiz pêvînayîşê xo de cuya kênaya xo, kesayetê aye ke ciwanîya aye de aver vejîyabi û prosesê têkoşînê aye bi detayî ardî ziwan. Tarîxê qirkerdişê Dêrsimî ra dest pêkerd û beşdarbîyayîşê Sakîne yê mîyanê têgêrayîşê şorişgerî yê demê ciwanîye û munaqeşeyê mîyanê keyeyî îfade kerdî.

Cansize dîyar kerd ke aye verê cû vera eleqeyê domananê xo yê sîyasetî de vindertbî la Sakîne bi israr dewam kerd. Vat ke Sakîne demê lîse de beşdarê çalakîyanê şorişgeran bîye û pey ra ameye girewtene û Xarpêt, Meletî û Amed de şîdeto xurt dî. Zeynepe Cansiz prosesê Zîndanê Amedî sey "Cehennem" name kerd û vat ke kênaya aye heme şîdetan ver de zî xoverdayîşê xo dewam kerd.

Qismê tewr baleantoxî yê pêvînayîşî poşmanîya Zeynepe Cansiz bîye. Dîyar kerd ke keyeyî zî Sakîne ser o zordarîye kerda û vat: "Ma a fam nêkerde. Ma aye ser o zordarîye kerde. Pey ra mi fam kerd ke Sakîne seba merdimîye têkoşîn kerdêne." Pêvînayîşê xo yê peyênî de vat: "Birîna mîyanê zerrîya mi gird a. Xozî ma bizanayêne, ma paştî bidayêne aye. Nika ez çiqas biberma zî bêfeyde yo... Mi a newe fam kerde."

Bi merdişê Zeynepe Cansiz ra dima, no pêvînayîş hem şahidîya mayêke yo hem zî derheqê cuya Sakîne Cansiz de belgeyêko muhîm o.