Li çar aliyan kurd li dijî komployê meşiyan

Bi sed hezaran kurd li gelek navendan daketin qadan û komploya 15ê Sibatê bi meş û çalakiyên cuda şermezar kirin.  

Qamişlo
Bi deh hezaran gelê bajarê Qamişloyê li dijî Komploya Navnetewî ya 15ê Sibatê meşiyan û bi yek dengî berxwedana Rêber Abdullah Ocalan silav kir. Gelê bajarê Qamişlo yê Cizîrê ji 7 salî heta 70ê salî, ji bo şermezarkirina Komploya Navnetewî ya 15ê Sibatê daketin qadan. Kolanên Qamişloyê bi wêneyên Rêberê Gelê Kurd Abdullah Ocalan xemilîn. Gel li Çerxerêya Osman Sebrî kom bû û heta Çerxerêya Şehîdan a li naverasta bajarê meşiyan. 

Di meşê de parkarta “Êrişa 6ê Çileyê ya Li Ser Rojava, Plangeriya Duyemîn a 15ê Sibatê ye” hildan. Gel bi yek dengî û nîşaneyên serkeftinê dirûşmên “Bijî Berxwedana Îmralî”, “Bijî Serok Apo”, “Bê Serok Jiyan Nabe” û “Berxwedan Jiyan e” berz kirin.

Meş li Çerxerêya Şehîdan veguherî mitîngê.

Mitîngê bi kêliyek rêzgirtin ji bo giyanê şehîdan dest pê kir. Li ser navê Înîsyatîfa Gel Hevseroka TEV-DEM’ê Remziya Mihemed axivî. Remziya Mihemed gelê Kurd û dostên gelê Kurd ên li ser pêyan silav kir û got: “27 sal derbas bûn, careke din komploya navneteweyî li ser gelê Kurd dubare dibe. Dîrokê xwe dubare kir. Lê divê em vê dîrokê biguherin. Em bikin dîroka azadiya Rêber Apo. Komploya ku armanca wê qutkirina gel û Rêber Apo bû, 27 sal derbas bû, lê rojane gelê Kurd, dostên gelê Kurd ji bo Rêber Apo li ser pêyan in. Girêdana di navbera gel û Rêber Apo de xurttir bû. Di Rojava de gelê Kurd û gelên din dikarîn xwe birêve bibin. Karîbûn xwe biparêzin, lê tehemûla netewdewlet ku destê wan di Komploya 15’ê Sibatê de hebû, dîsa komployek li ser gelê Rojavayê Kurdistanê-Bakur û Rojhilatê Sûriyeyê dan meşandin. Çawa Komploya Navneteweyî ya 15’ê Sibatê bi fikrê Rêber Apo vala derket, çawa ciwanên Kurd li hemberî terora DAIŞ’ê axa parastin, çawa îro gelê Kurd li herçar parçeyên Kurdistanê û Ewropayê ji bo azadiya Rêber Apo li ser pêyan in, em ê vê berxwedanê bidomînin. Em ê xeta azadiya gelan û aştiyê ya Rêber Apo daye pêşiya me biparêzin. Bijî yekitiya gelê Kurd.”

Mitîng bi nîşanên serkeftinê û sirûda “Çerxa Şoreşê” bi dawî bû, gel tevahî bi yek dengî sirûd xwend.

Hesekê 

Şêniyên Hesekê li çerxerêya Itfaiyê ya li taxa Til Hecer kom bûn. Şênyan pankarta bi nivîsa "Êrişa 6ê Çileyê ya li ser Rojava xiyaneta duyemîn a 15`ê Sibatê ye." Her wiha wêneyên Rêber Abdullah Ocalan û sembol û alên Kurdî bilind kirin.

Beşdaran dirûşmeyên "Gel azadiya Ocalan dixwaze", "Bê Serok jiyan nabe" û "Bijî berxwedana li Îmraliyê" qîr kirin.

Meş li çerxerêya Itfaiyê dest pê kir û ber bi stadyuma Bendava Tişrînê ve çû. Piştî deqeyek rêzgirtinê endama Hevserokatiya Partiya Yekîtiya Demokratîk (PYD) Hediya Yûsif axivî û komploya navneteweyî û hêzên têkildar şermezar kir.

Hediya got, "Em silav û hezkirina xwe ji Rêber Abdullah Ocalan re dişînin. Ev komploya navneteweyî li dijî felsefeya azadî, edalet û demokrasiyê û îradeya gel bû."

Hediya destnîşan kir ku "Aliyên ku beşdarî vê komployê bûne, biratiya di navbera gelan de an jî avakirina civakek azad û demokratîk naxwazin, ji ber vê yekê ew îro jî êrişên xwe yên li ser herêmê didomînin."

Hediya Yûsif diyar kir ku "felsefeya Rêber me hiştiye ku em jiyanek azad, bi rûmet û demokratîk bijîn, û bûye felsefeyek gerdûnî ku yekîtiya gelan û edaletê xurt dike. Rêber îro li Îmraliyê ji bo gelê xwe têdikoşe, û ew der kiriye akademiyek ji bo ramana demokratîk a azad."

Hediya Yûsiv di dawiyê de got ku pêşengiya jinan a vê şoreşê serkeftinek mezin e, û parastina destkeftiyên wê armancek bingehîn e.

Meş bi qîrîna dirûşmeyên silavkirina berxwedana Rojava û daxwaza azadiya fizîkî ya rêber Abdullah Ocalan bi dawî bû.

Êlih-Amed 

Bi boneya salvegera 27an a Komploya Navneteweyî ya 15ê Sibatê ya li dijî Rêberê Gelê Kurd Abdullah Ocalan, bi dirûşma “Bi ronahiya heqîqetê ber bi azadiyê ve” li Êlih û Amedê meş hat lidarxistin. Gelek kesên bi pêşengtiya Platforma Saziyên Demokratîk li pêşiya Bîrdariya Mafên Mirovan a Parka Koşuyoluyê ya navçeya Rezanê hatin gel hev, bi çepik, tililî û dirûşman ber bi Qada Stasyonê ve dimeşin. 

 Li Êlihê jî girseya ku li ser Cadeya Gulistanê kom bû, bi pankarta “Bi ronahiya heqîqetê ber bi azadiyê ve” ber bi avahiya DEM Partiyê ya Êlihê ve dimeşe. 

Li Qada Topçu ya navçeya Halîliye ya Rihayê jî daxuyaniyeke girseyî hate dayin û gelek kes tev li bûn. 

 Nûnerên HDK, TJA û DEM Partiyê, bi boneya salvegera Komploya Navneteweyî ya 15ê Sibatê li Qada Aksarayê ya navçeya Fatîhê ya Stenbolê daxuyaniyê dan. 

Cizîr

Platforma Ked û Demokrasiyê ya Şirnexê jî bi heman armancê çalakî pêk anî. Nûnerên partiyên siyasî, saziyên sivîl û gelek welatî li ber Rêxistina Navçeya Cizîrê ya DEM Partiyê kom bûn. Girseya pankarta, “Bi ronahiya heqîqetê ber bi azadiyê ve” vekir, dowîzên, “Bijî Serok Apo” û “Bê Serok jiyan nabe” vekirin. Girseya heta Çerxereya Dortyolê meşiya sloganên, “Bê Serok jiyan nabe” û “Silav silav ji Îmraliyê re hezar silav” berzkirin. Welatiyan ronahiyên telefonên xwe pêxistin û tarîtiya şevê ronî kirin. Piştî meşê daxuyaniyek hate dayîn. Daxuyanî bi merasîma rêzgirtinê dest pê kir. Hevserokê DBP’ê yê Cizîrê Bager Aşkin di axaftina xwe de diyar kir ku heta Rêberê Gelê Kurd Abdullah Ocalan azad nebe, kes azad nabe. Piştî wî, Hevserokê DEM Partiyê yê Cizîrê Yilmaz Sanri metna hevpar xwend û destnîşan kir ku komplo têk çûye û Abdullah Ocalan bi ser ketiye. Parlamentera Şirnexê ya DEM Partiyê Newroz Uysal Aslan jî komploya navneteweyî şermezar kir û ev tişt got: “Gelê Kurd her sal li dijî komployê li qadan e. Yahya Menekşe berî 15 salan dema komplo şermezar dikir hat qetilkirin. Em wî bi rêzdarî bi bîr tînin. Me ev komplo nas nekiriye û em ê nas nekin. Ne komploya 15’ê Sibatê û ne jî komployên li ser Rojava, em tu carî qebûl nakin. Gelê Cizîrê dê her tim xwedî li îradeya xwe derkeve. Heta ev roja reş bibe ronahî, em ê têkoşînê berdewam bikin. Kurdan li Rojava bersiva komployê da. Îro dixwazin komployê nû bikin, lê gelê Kurd dê li dijî vê heta dawiyê li ber xwe bide.”

Girse bi dirûşmên “Bijî Serok Apo” bi dawî bû. Piştî daxuyaniyê girse bi dirûşmên “Bijî berxwedana Rojava” û “Bi can bi xwîn em bi te re ne ey Serok” heta ber avahiya partiyê meşiya.

Stenbol

Platforma Saziyên Demokratîk a Stenbolê li Qada Aksarayê ya Stenbolê li dijî komploya navnetewî daxuyanî dan. Parlamenterên DEM Partiyê, Hevserokên DEM Partiyê yên Stenbol û navçeyan, Dayikên Aştiyê, HDK, TJA, nûner û rêveberên saziyên civakî û gelek welatî tev li çalakiyê bûn. Li qadê dirûşmeyên “Bijî Serok Apo”, “Bijî Berxwedana Rojava” Bê Serok Jiyan Nabe” hatin berzkirin û pankarta “Bi roniya heqîqetê ber bi azadiyê ve” û “15ê Sibatê dişkinî, bi rêberê azadiyê re 27ê Sibatê înşa dikin” hat vekirin. Hevseroka Stenbolê Arîfe Çinar di daxuyaniyê de axivî û got: “Bi têkoşînê komplo vale derket. Îro pêvajo heye lê hê jî tecrîd berdewam dike. Em dizanin ku pêvajo bi azadiya Rêberê Gelê Kurd Abdullah Ocalan ve girêdayî ye.”

Daxuyanî bi berzkirina dirûşmeya “Bijî Serok Apo” bi dawî bû.

Enqere 

Platforma Saziyên Demokratîk ên Enqereyê, di salvegera komploya navneteweyî ya li dijî Rêberê Gelê Kurd Abdullah Ocalan li cahdeya Sakarya ya navçeya Çankaya ya Enqereyê daxuyanî dan. Parlamenter û cigirê hevserokên giştî yê DEM Partî Mehmet Ruştu Tîryakî, endam û nûnerên partiyên siyasî û saziyên civakî yên giredayî platformê jî di daxuyaniyê de amade bûn. Beriya daxuyaniyê pankarta li ser, “Em komploya navdewletî şermezar dikin” dinivisî û wêneyê Rêberê Gelê Kurd Abdullah Ocalan hebû polîsan desteser kirin. Hevserokê DEM Partiyê Fatîn Kanat daxuyanî xwend û wiha got: “Rojava mînaka wekhevî û azadiya gelan e. Ji bo pêşveçûna pêvajoyê Aştî û Civaka Demokratîk divê mafê heviyê ji bo birêz Abdullah Ocalan û girtiyên siyasî pêk were.”

Mugla

Platforma Saziyên Demokratîk li Mûglayê li dijî komploya navneteweyî li pêşiya avahiyê DEM Partiyê yê navçeyê daxuyanî da. Daxuyaniyê Hevseroka DEM Partiyê ya Muglayê Zuhal Macît xwend. Zuhal Macîd da zanîn ku Rêberê Gelê Kurd Abdullah Ocalan ji 15ê Sibat a 1999an ve li Girtîgeha Îmraliyê di bin şert û mercên giran ê tecrîdê de tê girtin lê bi têkoşîna xwe ya ji bo aştiyeke birûmet û demokratîkbûnê, ev komplo pûç kir. 

Daxuyanî bi berzkirina diruşman bi dawî bû. 

Riha 

Li Qada Topçu ya navçeya Halîliye ya Rihayê jî daxuyaniyeke girseyî hate dayin û gelek kes tev li bûn.

Dêrsim

Platforma Saziyên Demokratîk a Dêrsimê li Kolana Hunerê derbarê Komploya Navneteweyî ya 15ê Sibatê de daxuyaniyek da. Di xwepêşandana pankarteka bi nivîsa, “Êve roşta raştîye verva ozadîye” hatibû vekirin de, Hevserokê Bajar a Dêrsimê ya DEM Partiyê Ozcan Ateş axivî û komplo şermezar kir. Piştre, Parlamentera bajêr Ayten Kordu axivî û balkişand ser Komploya 15ê Sibatê. Kordu got ku armanca Komployê tunekirina hebûna gelê Kurd bûye. Kordu diyar kir ku ev ne komployeke di kesayeta Birêz Ocalan de li ser Kurdan hatiye sepandin bûye û wiha got: “Armana vê Komploye tunekirina gelê Kurd bû.

Xarpêt 

Platforma Saziyên Demokratîk a Xarpêtê jî bi heman armancê li Garaja Hozatê daxuyaniyek da çapemeniyê. Li ser navê koma pankarta, “Em Komploya 15ê Sibatê bi ronahiya rastî û azadiyê şermezar dikin” vekirî, Hevseroka Navçeya Navendî ya DEM Partiyê Saadet Yavuz daxuyanî xwend. 

Çewlîg 

Platforma Saziyên Demokratîk a Çewligê jî Komploya 15ê Sibatê li Qada Bajar bi daxuyaniyekê şermezar kir. Li ser navê koma pankarta “Em Komploya 15ê Sibatê bi ronahiya heqîqê û meşa ber bi azadiyê ve şermezar dikin” vekir daxuyanî hate xwendin. Hevserokê Rêxistina Bajar a Çewlikê ya DBPê Şevket Kalindamar banga mezinkirina têkoşîna li dijî komployê kir. Hevserokê Rêxistina Bajar a Çewlikê ya DEM Partiyê Sedat Ormangoren jî axatinek kir û komploya li dijî Rêberê Gelê Kurd Abdullah Ocalan şermezar kir.