KNK’yî Qirkerdişê 1915î şermezar kerd û veng da: Sûcê merdimîye nas bikerê

KNK’yî Qirkerdişê 1915î reyna bi hawayêkê xurtî şermezar kerd û waşt ke qirkerdiş hetê heme meqam û dezgehanê eleqedaran ra bêro naskerdene.

Kongreya Neteweyî ya Kurdîstanî (KNK) boneyê serrgêra Qirkerdişê 1915î eşkerayîyêka nuştekîye daye.

Eşkerayîya KNK’yî wina ya: "Împaratorîya Osmanî û hevalbendanê ci, serra 1915î de vera şaranê xirîstîyanan ê Mezopotamya û Anatolya qirkerdişêko gird ca ard. Nê qirkerdişî de xeylê kurdê êzîdî zî cuya xo ra bîyî. Nê qirkerdişî de îdarekaranê Cemîyetê Îttîhad û Teraqî, çeteyanê Teşkîlat-i Mahsusa, alayanê Hamîdîye û qomîseranê artêşa Osmanî ca girewt û vera merdimîye sûcêko gird kerd. Şarê armenî û asurî-suryanî-keldanî seba ke tarîx û kulturê înan bêrê çinkerdene, ameyî kiştene. No qirkerdiş sûcêkê merdimîye yo ke nêşêno bêro redkerdene. Delîlê tewr şênber û raştikên zî, kiştişê yew û nêm mîlyonî ra zêdeyêr kesan o."

KNK’yî wina dewam kerd: "Nêm mîlyonî ra zafêr asurî-suryanî-keldanîyî û yew mîlyonî ra zêdeyêr armenîyî, cayan û hawayanê cîyayan de bi barbarîye ameyî kiştene. Bi Qanûnê Tehcîrî sehezaran kesî ameyî sirgunkerdene. Zafê înan kênekî û cinîyê ciwanî bîyî, bi hezaran kesî bi zorî ameyî musilmankerdene û bi hawayêkê bêînsanîye ameyî zewicnayene. Bi hezaran warê ciwîyayîşî, kilîseyî, manastirî, mektebî, kitabxaneyî û fabrîkayî ameyî rijnayene. Mulk û serwetê ke hûmara înan nêyena zanayene, ameyî talankerdene û xespkerdene."

Peynîye de KNK’yî dîyar kerd ke serî ra 111 serrî vîyartê zî, Komara Tirkîya ke dewamkerdoxa Împaratorîya Osmanî ya, nê qirkerdişî qebûl nêkena û no yeno a mana ke a zî hemkara nê sûcan a.

KNK’yî Komara Tirkîya dawet kerde ke nê qirkerdişî nas bikero û îcabê naye bîyaro ca.