KJKê bersiv da banga Abdullah Ocalan

Koordînasyona KJKê bi wesîleya 8ê Adarê Roja Jinan a Cîhanê daxuyaniyek da. Daxuyaniya KJKê bi vî rengî ye: "Em bi berpirsyariyeke mezin a civakî û dîrokî xwedî li daxuyaniya Rêber Apo derdikevin ku di yekemîn salvegera banga Aştî û Civaka Demokratîk a 27ê Sibatê de da. Em soz didin ku wezîfeya hêza pêşeng a ku Rêber Apo daye me jinan, bi layiqî bi cih bînin.

Em bi bûyerên dîrokî ketin meha Adarê. Meha Adarê lêgerîna azadiyê ya xwezayê bi biharê tacîdar dike, di heman demê de ji bo dîroka me ya azadiyê ya jinan rola dayiktiyê ya têkoşînên herî dijwar û bi heybet lîstiye. 8ê Adarê bûye sembola berxwedana azadiyê ya jinan. Cejna vejîn û berxwedanê Newroz jî di şexsê kurdan de veguheriye agirê azadiyê yê hemû bindestan, gelan û jinan. Meha Adarê meha şehîdên me ye, ku agirê azadiyê bi bedena xwe vêxistin û ji bo azadiyê bi berxwedana xwe ya bêhempa bûne nemir. Bi vê wesîleyê di şexsê şehîdên 8ê Adarê û Newrozê de em hemû şehîdên şoreş û demokrasiyê bi rêzdarî, hezkirin û minetdarî bi bîr tînin û diyar dikin ku em ê agirê azadiyê veguherînin govenda jiyana azad a gelan û bibin hêz, pêşeng û cewherê jiyana komunal.

Di dîroka me ya têkoşîna dijwar a 52 salan de li ser bingeha pirsgirêkên azadiya jinan û çareseriya wê weke tevgera jinan me bi hemle û kampanyayan qonaxên têkoşîna girîng ji bo civakîbûna hişmendiya azadiyê pêş xist. Di van sê salên dawî de hemleya me ya ‘Em bi Jin Jiyan Azadî ber bi Şoreşa Jinan ve Dimeşin’ ne tenê li Kurdistanê di asta Rojhilata Navîn û gerdûnî de zanebûna azadiya jinan, sîstema avabûna ji nû ve û berxwedanê bi pêş xistiye. Jin Jiyan Azadî êdî ne tenê felsefeyeke teorîk e, weke dirûşmeyeke kûreyî tenê bi jinan re sînordar nemaye û weke felsefe û hêviya rizgariyê ya mêran li qadan belav bûye.

Hemleya ‘Em bi Jin Jiyan Azadî ber bi Şoreşa Jinan ve Dimeşin’ bi dawî bû

Bi banga Rêber Apo ya dîrokî, civakî, felsefîk û manîfestoya civaka komunal re em li ber qonaxa ronahiyekê, ji nû ve jidayikbûnê û xwe ji nû ve avakirinê ne. Em bi wesîleya 8ê Adarê Roja Jinan a Cîhanê hemleya bi şîara ‘Em bi Jin Jiyan Azadî ber bi Şoreşa Jinan ve Dimeşin’ bi dawî dikin û îro jî radigihînin ku me ji bo azadiya gelan û jinan bigihije statuyeke mayînde hemleyeke stratejîk daye destpêkirin.

Hemleya me ya ku em ê bi şîara ‘NIHA DEMA JINÊ YE!’ bidin destpêkirin, li dijî koletiya jinan, bêstatutiyê, bênasnamebûnê, bêqanûniyê, bêhiqûqiyê, polîtîkayên şerê taybet ên dijminê jinan û her cure tundiya li hemberî jinan, hemleyeke welê ye ku têkoşîna me ji şoreşa negatîf derbasî şoreşa pozîtîf bibe. Ji bo avakirina sîstema me ya li ser esasê azadiya jinan, ekolojîk, demokratîk û civaka komunal, niha dema jinan e!

Ev hemleyeke welê ye ku felsefeya azadiya jinan, hevrêtî û sîstema Rêbertî bi pêş dixe, azadiya fîzîkî ya Rêber Apo misoger dike, şert û mercên xebat û jiyana azad ji bo wî ava dike û astengiyên li pêş meşandina siyaseta demokratîk û projeya civaka demokratîk, radike. Li ser esasê Aştî û Civaka Demokratîk çareserkirina pirsgirêka kurd a du sed salî, alternatîfa çareseriya krîza gerdûnî jî ava dike. Azadiya fîzîkî ya Rêber Apo di vî warî de bi pêşengiya jinan têkoşîneke gerdûnî heq dike.

Laşê jinan wekî çekeke şer tê bikaranîn. Jin rastî tacîz, destdirêjî û kuştinê tên. Jin li dijî polîtîkayên şer ên zayendperest, olî û neteweperest şer dikin. Felsefeya Jin Jiyan Azadî parastina xwe, demokrasî, wekhevî û azadiyê diparêze. Niha dem hatiye ku jin van nirxan di civakê de bi jiyanî bikin û nasnameyek rêxistinkirî bi dest bixin.

Kurd li navenda şerê cîhanê yê 3yemîn in 

Ev du sed salên dawî kurd û Kurdistan bi polîtîkayên asîmîlasyonîst, qirker û komployên navneteweyî hatiye parçekirin. Kurd li navenda şerê cîhanê yê 3yemîn in, di heman demê de hedefa şer in jî. Timî bi êrişên şer re rû bi rû ne. Derbaskirina van polîtîkayan, bi yekîtiyeke neteweyî ya ku wê dîroka kurdan ji nû ve ava bike û bi yekîtiya neteweyî ya jinan pêkan e. Li ser vê bingehê li dijî polîtîkayên qirkirinê û ji bo avakirina perspektîfa neteweya demokratîk, em dibêjin niha dema yekîtiya neteweyî ya jinan e. Em bang li hemû jinên kurd dikin ku ji bo pêşketina yekîtiya neteweyî, berpirsyariya dîrokî bigirin û pêvajoyê bi yekîtiya neteweyî tacîdar bikin. Ji bo pêkhatina statuya kurdan û rastiya kurdan bikeve nava hiqûqê, niha dema jinan e!

Li Rojava YPJ bi hêza xweparastinê, bi rêxistinbûna jinan û bi sîstema xwe ya nûneriya wekhev û hevserokatiyê bûye zemînê jeopolîtîk û stratejîk ê şoreşa jinan. Li dijî tarîtiya DAIŞ û HTŞê li Sûriye, Kurdistan, Rojhilata Navîn û seranserî cîhanê mîna stêrkeke dibiriqe. Niha vê şoreşa jinan û şoreşa Rojava hîna statu bi dest nexistiye, xeterî hîna mezin e. Ji bo ku YPJ ne tenê weke hêza xweparastinê ya Rojava, weke hêza xweparastinê ya hemû jinan bibe xwedî statu, di zagona bingehîn de wekheviya jin-mêr û di hemû jiyanê de mafê jinan ê tevlibûna azad-wekhev were misogerkirin, ji bo avakirina statuya şoreşa jinan niha dem dema parastina Rojava, şoreşa jinan û YPJê ye. Bi şoreşa jinan a Rojava re niha dema jinan e!

Kûrbûna şer bi kûrahiya koletiya jinan ve girêdayî ye. Hingî jin azad bibe, koletî, jiyan û pîvanên ku sîstema desthilatdariya mêr li ser jinan ferz dike bên derbaskirin, wê şer, sîstem û çanda tundiyê jî bên tunekirin. Li ser vê bingehê mezinkirina tevgera aştiyê ya jinan û yekîtiya têkoşînê, wê bibe stratejiya têkoşînê ya hemleya me. Li dijî tundî û şerê li hemberî jinan û civakê, em dibêjin niha dema aştî û xweparastina jinan e.

Kujerên kastîk cîhanê bi rê ve dibin

Qezenckirina asta kûreyî ya hegemonyaya desthilatdariya mêr, rêxistinbûna têkoşînê ya di asta gerdûnî de jî neçar dike. Weke di dosyaya Epstein de jî derketî holê êdî zihniyeta DAIŞê û kujerên kastîk ên dijminê jin û zarokan cîhanê bi rêve dibin. Olperestî, zayendperestî, netewperestî di şerê li dijî jinan de bûye yek. Li dijî vê desthilatdariya mêr êdî dema rêxistinbûna hevpar a hemû jinên cîhanê, têkoşîna xweparastinê û avakirina konfederalîzma jinan a cîhanê ye. Têkoşîna jinan a gerdûnî û sîstema wê, wê civaka azad û demokratîk ava bike. Lewma jî niha dema jinan ye!

Hemleya me di heman demê de ji bo derbaskirina krîza heyî û nakokiya navbera jin û mêr, guhertin û veguherîna mêr a li ser esasê pîvanên demokratîk, azadî û wekheviyê armanc dike. Li ser vê esasê em bang li hemû mêrên azadîxwaz dikin ku bi xeta azadiya jinê û li ser esasê avakirina jiyana demokratîk, kesayeta azad û jiyana nû tevlî vê hemleyê bibin.

Niha dema jinan, dema avakirina jiyana komunal e!

Civaka dîrokî ya ku ewilî ji aliyê jinan ve hat avakirin, bi pêşengiya jinan civaka komunal, demokratîk, azadîxwaz, ekolojîk û aştiyê ye. Em rû bi rûyê wezîfeyeke welê ne ku civaka azad û demokratîk a di dîroka xwe de nû bikin û dîrokê ji bo berjewendiyê jinan û gelan veguherînin. Rêxistinbûna komunal weke sîstemeke azad, xweser, rêveberiya xweser û hevpar, çareseriya kaos û krîzên civakî ye. Lewma niha dema jinan, dema avakirina jiyana komunal e!

Li ser vê bingehê em bang li hemû jinan dikin ku bi rengekî xurt tevlî hemleyê bibin, xwe rêxistin bikin û pêvajoya ku ji aliyê Rêber Apo ve hate destpêkirin bi serketinê tacîdar bikin. Di heman demê de em bang li hemû sazî û tevgerên jinan ên demokratîk û azadîxwaz dikin ku xwedî li hemleya me derkevin û piştgiriyê bidin.

Em 8ê Adarê Roja Jinên Kedar ên Cîhanê li hemû jinên ku ji 1ê Adarê heya 8ê Adarê wê lêgerîna azadiyê li qadan bînin ziman û di nava çalakiyan de bin, pîroz dikin. Em şehîda xwe ya mezin Sema Yuce ku di zindîbûna felsefeya azadiya jinan de bûye sembol, bi rêzdarî, hezkirin û minetdarî bi bîr tînin. Em mîrateya ku heval Sema bi çalakiya xwe ya mezin ji me re hiştiye dewr bigirin û ji 8ê Adarê heya 21ê Adarê bibin pir. Em ruhê hemleya niha dema jinan e bigihînin bihara Newrozê."