KCK: Şarê Kurdî Îsmaîl Agaç xo vîr ra nêkeno

Hemserekîya Konseya Rayraberdişê ya KCK’yî seba Îsmaîl Agaçî eşkerayîyêk daye ke tarîxê têkoşînê azadîya Kurdîstanî de bi rolê xo yê welatperwerîye yeno naskerdene û cuya xo ra bîyo . KCK’yî keye, merdim û heme şarê Kurdîstanî rê serweşîye waşte.

‘Keyeyê xo têkoşaran rê akerd’

Eşkerayîye de ama dîyarkerdene ke Agaçî, Hîlwan de vera zilmê axa û began ê ke paştî danê dewlete, vindertişêko bi rûmek û serewedaryane nîşan dayo. KCK’yî dîyar kerd ke Agaçî wextanê tewr zehmet de berê keyeyê xo milîtananê destpêke yê têkoşîne rê akerd û wina vat: “Keyeyê ey seba Apoyîyan sey qerargahêke bi. Wexta ke dewlete û axayan hêrişê taxa înan kerdê, ey bi cesaretêko gird cewab da û vera zilmê sere nênaro.”

Tedayan ver koçber bî

Dewamîya xebere de ame vîradene ke keyeyê Agaçî badê darbeyê leşkerî yê 12ê êlûle de raştê teda û îşkenceyanê giran ê dewlete ameyê û nê çî ver neçar mendê û koçê derûdorê Mêrsîn û Edene bîyê.

‘Hîrê gedeyê ey şehîd bîyî’

KCK bale ante bedelê ke keyeyê Agaçî dayê ser o û destnîşan kerd ke Îsmaîl Agaç û cinîya ey Aynzelxa, hîrê gedeyê xo têkoşînê azadîye de şehîd daye û hema zî yew laj û di tornê ey mîyanê têkoşîne de ca gênê.

Eşkerayîye wina qedîya: “Îsmaîl Agaç bi feqîrîya xo û warê manewî de kesêko zengîn bi. Ma ey bi rêzdarî xo vîr anê û soz dane ke ma do bibê layiqê ey. Hîkayeya nê keyeyî layiqê roman û sînemayê yê. Hemrayîr û şarê Kurdî, do ey tu car xo vîr ra nêkerê.”