KCK: Hedefê nê 8ê Adare ganî azadîya Rayber Apoyî bo

Hemserekîya Konseya Rayberî ya KCK’yî 8ê Adare ser o eşkereya nuştekî da.

Eşkeraya KCK’yî wina ya:

“Pergalê mêtingerîye û zulmî bi koledarîya cinîyan dest pêkerdê. Serdestîya camêrdan a serê cinîyan bîya destpêkê pêro xirabîyan. Modernîteya kapîtalîste cinîyî kerdê qralîçeya metayan, nê zî komel û merdimayetîye arda ver bi qedîyayîşî. Labelê cinîyî ke ferqê na koletîya xorîne kerdî, têkoşînê azadîye û demokrasî de gamî eştî û bîyî hêzêko komelkî. Rayber Apoyî serra 1998î de îdeolojîya xelisîyayîşê cinîyan vete werte. Bi nê averşîyayîşî têkoşînê azadîya cinîyan ê kurdan bîyo bingehêkê îdeolojîk û teorîkî. Ewro hêzê azadîyê yê cinîyan pêro dinya de xoverdayîşêkê yewbîyayeyî berz kenê. Bi Konfederalîzmê Demokratîkî yê Cinîyan ê Dinya reyde cinîyî do sîstemê sosyolîzmê komelkî yê demokratîkî de rolê rayberîye kay bikerê. Têkoşînê cinîyan tarîtîya modernîteya kapîtalîste de bîyo hêvîya merdimayetîye. Ma na yewe serewedaritişê 'Jin, Jiyan, Azadî' de zî dîye.

Şerê Dinya yê 3yinî Rojhilatê Mîyanênî de qewimîyeno. Çimeyê pêro şîdet û şeran serdestîya camêrdan a. Heta ke zulmê serê cinîyan nêqedîyo, şerî zî nêqedîyenê. Camêrdî zî koleyê sîstemê serdestîya camêrdan ê. Ganî camêrdî zî xo bişiknê û tewrê têkoşînê azadîya cinîyan bibê.

Rayber Apoyî seba têkoşînê azadîya cinîyan kede xeylê weş daye. Seba ke prosesê Aştî û Komelê Demokratîkî aver şoro, ganî Rayber Apo bi hawayêkê azadî biciwîyo û bixebitiyo. Coka ganî cinîyî seba azadîya Rayber Apoyî rayberîya têkoşînî bikerê. Hedefêko tewr girîng ê nê 8ê Adare ganî azadîya Rayber Apoyî bo. Azadîya Rayber Apoyî do bibo wesîleya prosesêkê neweyî. Ma na bawerîye de yê ke 8ê Adare yê emserî do azadîya Rayber Apoyî hîna nêzdî bikero. Ma nê esasî ser o Roja Cinîyan ê Kedkaran ê Dinya fîraz kenê.”