Îranî vera Herêma Federe ya Kurdîstanî de gef wend

Şerê Îran, Îsraîl û DYA’î domyeno. Destpêka şerî ra nika Îran, xususî hêrişê cirananê xo keno. Nika zî Endamê Konseya Pawitişî ya Îranî Elî Ekber Ehmedîyanî, gef vera rayberîya Herêma Federe ya Kurdîstanî de wend. 

Ehmedîyanî dîyar kerd ke eke partîyê kurdanê Rojhelatî sînoran derbas bikerê, do heme binesazî û dezgehî bibê hedef û wina va: “Ma dost û wayûbirayanê xo yê Herêma Kurdistanî re vanê; heta nika tenê baregehê DYA, Îsraîl û komê cîyawazî yê herêmî bîyî hedef.”

Ehmedîyanî da zanayene ke do hêrişî hîra bibê û nê çîyî îfade kerdî: “Labelê eke nê komî bikewê sînoranê Îranî, do heme dezgeh û tesîsê Herêma Kurdistanî bibê hedef. Derbasbîyene endamanê partîyanê kurdan, do sey ‘paştdayîş’ ê Herêma Kurdistanî bêro hesibnayene. Rewşêka winasî de do hêrişî hîra bibê û paştdayîşê dostane yê Îranî yo ke seba Herêma Kurdistanî yo, do biqedîyo.”