Gurlek: 'Ma qerardar ê ke nê prosesî de gamê lezabezî bierzê'

Wezîrê Edaletî Akın Gurlek o ke seba tayê têkilî û kombîyayîşan ameyo Amed, dima ke Walî Murat Zorluoglu zîyaret kerd, eşkerayîyî dayî.

‘Sey Wezaretê Adaletî ma berpirsîyarîya xo ra agahdar ê’

Gurlekî derheqê şerê Îranî û averşîyayîşê ke Rojhelato Mîyanên de qewimîyenê de ercnayîşî kerdî.

Derheqê proseso ke Tirkîya de dewam keno de wina va: 

"No tarîtîyo ke bîyo webalê cografyaya ma, do bi roşnîya aştîye, birayîye û Tirkîyaya demokratîke ke welatê ma ra berz bena, roşnî bibo. Sey ke şima zî zanê, ma reyna dî ke vînayîşê nê rojan û îradeyê girewtişê tedbîranê verweşan, xirabkerdişê heme ezberan û vinderdişê cesurî yê Îtîfaqê ma yê Cumhurî ke welatê ma nê gêjêka şerî ra teber de tepişeno, semedê welatê ma û herêma ma çiqas qîmetdar o. Nê nuqte de ez şexsê xo de seba karkerdoxîya ey a nê prosesî, Birêz Devlet Bahçelî rê ke tim bi hawayêko xurt bal antişê yewîya neteweyî û birayîye keno, sipas keno. 

Birayîye ra ravêrena

Na cografya de rayîrê xurtmendişî yewîye, pîyabîyayîş û birayîye ra ravêreno. Ma pîya xurt ê. Ma do travmayên heme dormerayan ê vîyarteyî caverdê û xizmetê dawa ma ya Tirkîyaya xurte bikerê. Çunke ma şahidî kenê ke her dormera amade yo ke derheqê vîyarteyî de fedakarîye bikero. Bi nê armancî, semedê resayîşê welatê ma yê standardanê dewleta huqûqî ya demokratîke ya tewr berze, sey Wezaretê Edaletî ma berpirsîyarî û hişmendîya ke kewena ma mil ra agahdar ê. Sey Wezîrê Edaletî, ma pê zanê ke heqê resayîşê xizmetanê edaletî yo wextê xo de û bitesîr ê her welatdarê ma, milanê ma ser o berpirsîyarîyên tewr bingeyênan ra yew o. Bi nê hewayî, ma do seba pawitiş û xurtkerdişê resayîşê edaletî, îradeyê xo bi qerardarî bidomnê. Çunke no îrade nê tenya yê ewroyî, yo sibayî zî temînat o. Hukmatê ma semedê xebitîyayîşê sîstemê edaletî bi hawayêko tewr averşîyaye û bitesîr, şewe û roje xebatanê xo domneno. 

Ma îhtîyacan vînenê

Azm û qerardarîya xo ya semedê temînkerdişê serdestîya huqûqî bêtawîz mojneno ra. Bi nê fehmî, hukmatê ma û wezîranê ma yê adaletî yê ke vîyarte ra heta ewro wezîfe kerdî, seba ke xebatanê xo yê qîmetdaran dewam bikerê û na komkerde zêdêr aver biberê, ma do qerardarîya xo bidomnê. Sey Wezîrê Edaletî, semedê şopnayîş û nêzdî ra vînayîşê tetbîqkerdişê wezîfe û berpirsîyarîyanê wezaretê ma yê sahayan de, ma do heme gamanan bi hawayêko îstîqrarin teqîb bikerê. Reyna ma netîceyanê xebatanê ke Meclîsê Pîlî yê Neteweyî yê Tirkîya de yenê ramitene, vînenê. Ma vînenê ke rastkerdişê qanûnî yê ke binê banê Meclîsê Girdî yê Neteweyî yê Tirkîya de yenê viraştene, bi ekserîyet û destegê pîl ê partîyanê sîyasîyan raştaraşt verpers danê îhtîyacîyanê şarî. Semedê ma edalet tenya averşîyayîşê prosesanê darazî nîyo, eynî wext de hewayêko estbîyayî yê her warê cuye yo. 

Paketa 12. darazî demêko kilm de pêşkeş bena 

Ma pawitişanê welatdaranê xo zanê. Ma îhtîyacîyan vînenê. Semedê caardişê hewceyan, ma çi dest ra yeno kenê. Nê çarçewe de, sey ke şima zanê, paketa ma ya 12. ya darazî bi îzna Heqî wextêko kilm de do pêskeşê Meclîsî bibo. Ez sey Wezîrê Adaletî wazena naye vajî. Rayîrê Tirkîyêya serkewtene serê bingeyê yewîya neteweyî û birayîye de yeno ramitene, ganî ma ê dehlîzê tarîyî yê ke wazenê berpirsîyarîyê ke her dormera girewtê provoke bikerê, înan ra agahdar bibê û bi sebir proseso ke aver şino rê paştî bideyê. Çunke tewr tenya rayîrê xopawitişê tehluyanê xorînan ê ke cografyaya ma rê ameyê ronayene no yo ke ma tewr zexm pê giredaye bibê û huqûqê xo yê biratîye aver biberê."