Fîgen Yuksekdage tewrê cenazeyê birayê xo bîye

Hemsereka Pêroyîya Partîya Demokratîke ya Şaran (HDP) ya verêne hepsîye Fîgen Yuksekdage, tewrê cenazeyê birayê xo M. Cavît Yuksekdagî bîye o ke vizêr Nêweşxaneyê Şaristanî yê Edeneyî de cayo ke tede tedawî vînayêne, weşîya xo kerda vîndî. Verpersdayîşê erênî yê serdayîşê dozgerîya Zîndanê Tîpê Fyî yê Kandira ser o, Fîgen Yuksekdage bi rayîrê hewayî ameye berdene bi Edene.

Fîgen Yuksekdage binê tedbîranê xurtan ê asayîşî de ameye berdene bi keyeyê şînî yê Taxa Namik Kemalî ya girêdayeya qezaya Ceyhanî. Tîya şîno ke ame ronayene de, Hemsereka Pêroyîya Partîya Têduştîye û Demokrasîyî ya Şaran (DEM Partîye) Tulay Hatîmogulları û partîyîyan, Fîgen Yuksekdage rê serweşîye waşte.

Cenazeyê Cavît Yuksekdagî saetanê sibayî de ame berdene bi keyeyê malbatî yê Taxa Namik Kemalî ya girêdayeya qezaya Ceyhanî û tîya de helalîye ameye waştene. Cenazeyê Cavît Yuksekdagî dima tîya ra ame berdene bi Goristanê Dewa Golovasî ya girêdayeya qezaya Yumurtalıkî ya Edene û ame definkerdene. Dima karê definkerdîşî ke bi beşdarbîyayîşê Fîgen Yuksekdage ame kerdene, kesê ke tewrê merasîmê cenazeyî bîyî ravêrtî çadira şînî ya ke amebî ronayene. Fîgen Yuksekdaga ke tîya tazîyeyî qebul kerdî, do ewro saete 20.00 de bi rayîrê hewayî bêra berdene bi zîndan.