Ekolojîya Mêrdîn û Dêrsimî binê tehlikeyê projeyanê RES û GES'î de ya
Mêrdîn û Dêrsim de erdê çandinîye û merayî binê tehlukeyê projeyanê Santralê Enerjîya Tîje (GES) û Santralê Enerjîya Vayî (RES) de yê. Nê projeyî ke bi nameyê "enerjîya pakî" virazîyenê, raştîye de ekolojî rê zirarêko pîl danê
Serî de Cengîz Holdîng, ÎSDEMÎR, CW Enerjî û Çemtaş Çelîk, xeylê şîrketî erdanê Mêrdînî îşxal kenê. Dêrik, Şemrex û Artuklu de rixmê nêrazîbîyayîşê şarî bi lez qerarê "ÇED o pozîtîf" dîyenê. Projeyê şîrketa Azyolî bi xoverdayîşê şarî hetê mehkeme ra ame vindarnayene la şîrketê bînî bi paştdayîş û teşwîqanê dewlete karê xo rê dewam kenê.
Zirarê Zanistî yê Santralan (GES)
Raporê zanistîyî mojenê ke nê santralî zirarêko bêpeyser danê ekosîstemî:
Ziwayîye û Erozîyon: Pêvajoyê ronayîşê panelan de herre bêpawitiş manena û no rîskê erozîyon û ziwabîyayîşî (hişkesalî) zêde keno. Nika Deşta Mêrdînî zî binê rîskê giran yê zuwayîye de ya.
Mîkro-îklîm: Germîya panelan mîkro-îklîmê herême bedilnena.
Xetereyê Heywanan: Tîrêjê ke panelan ra şewq danê, xapênayîşê kêzikan û teyran rê benê sebeb û zencîra ekolojîke xira kenê.
Kîmyewîyî: Maddeyê kîmyewîyî yê ke seba pakîya panelan xebitîyenê, rîskê herimnayîşê awe û herre virazenê.
Tehlukeyê RES’î û nêrazîbîyayîşê şarî
Heto bîn ra, projeyê RES’î ke mabênê Şemrex û Dêrikî de yenê plankerdene, hem heywananê kûvîyan hem zî cayanê tarîxîyan yê zey Kelayê Rabatî fînenê tehlikeyî mîyan. Pervaneyê girdî yê nê santralan ra xeylê teyrî mirenê. Şarê herême û dewijî vanê ke nê projeyî heywandarîye asteng kenê, heywanî kewnê stresî mîyan û dewijî nêeşkenê debara xo bikerê. Dewijî verba nê projeyanê talankerdişî bi heqdarî nêrazîbîyayîşê xo ramojenê.
