Cenazeyê Huseynîyî Amed ra ver bi Rojawan ame rayîr fîyayene

Cenazeyê Ehmed Huseynîyî yo ke 10ê adare de Swêd de nêweşxaneyê ke tede tedawîya qanserî dîyêne de weşîya xo kerde vîndî, ardî Amed. Merkezê Kongreyî yê ÇandAmedî de ke cenaze amebi ardiş, seba Huseynîyî merasîm ame viraştene. Embazê Huseynîyî yê têkoşînî, temsîlkarê dezgehanê komelê sîvîlî û partîyanê sîyasîyan û xeylêk kesî tewrê merasîmî bîyî. Tabutê Huseynîyî yo ke ronîya sehne ser, bi renganê zerd, sûr û keskî ame xemilnayene û qerenfîlî ronîyayî tabutî ser. Merasîmo ke fotografê Huseynîyî zî tede bîyî, bi rêzgirewtene dest pêkerd.

‘Ti resenê Rojawan’

Tîya de hunermend Şêrko Kanîwarî qisey kerd, bale ante ser ke Huseynî mîyanê şarê kurdî de cayêko girîng geno û vat ke ê do vîrardişê ey bidê ciwîyayene. 

Dima sînevîzyonêko ke weşîya Huseynîyî ser o bi, ame temaşekerdene. Hemserekê Şaredarîya Girde ya Amedî Dogan Hatunî bale ante cayo girîng yê Huseynîyî yê edebîyatê kurdkî ser û vat: "Seba şarê kurdî vîndîkerdişê ê kesanê ke mîyanê afirnayîşî de yê, xemêko pîl o. Embazê to do seba to binusê û afirnayîşî rê dewam bikê. To seba kurdan tim nuşt. Pêro eserê to seba şarê kurdî zaf girîng ê. To ra xatir waştene û to erşawitene zaf zor a. Embazê to rayîrê to de yê, wa çimê to dima nêmano. Ma eşqê to yê Rojawanî zanenê. Ti resenê Rojawan, merdimo rînd. Ma do to qet vîra nêkerê. Têkoşîno ke to seba kurdkî da, do rayîrê ma roşnî bikero."

'Ma do rayîrê to ra şîrê’

Hemverfeka Komîsyonê Ziwan, Kultur û Hunerî ya Partîya Têduştî û Demokrasîyî ya Şaran (DEM Partî) Cemîle Turhalli derheqê têkoşînê Huseynîyî yê seba kurdkî de qisey kerd û vat: "Heskedişê ey yê şarê xo, o seba afirnayîşî teşwîq kerdêne. O seba şarê kurdî tim halê afirnayîşî de bi. Şaîrêko baş, nuştox, welatperwer û embazêko baş ê têkoşînî bi. Yew aşiqê şarê xo, aşiqê kurdkî û edebîyatê kurdî bi. Seba şarê kurdî vîndîkerdişêko pîl o. Bedenen mîyanê ma ra abirîya. Labelê têkoşîn û eserê ey do bi ma reyde biciwîyê. Ma do rayîrê to ra şêrê."

Merasîmî ra dima cenazeyê Huseynîyî seba ke bierşawîyo Rojawan, serê Berê Sînorî yê Xabûrî ra ame rayîr fîyayene.