Cemîle Turhalli: Vengdayîş vengdayîşê cuya hempar o

Rayberê Şarê Kurdî Abdullah Ocalanî serrgêra 27ê Sibate de bi rayîrê Heyetê Îmraliyî de mesajêko tarîxî da. Mesajê ser o Hemverfeka Komîsyonê Ziwan, Kultur û Hunerî yê DEM Partîye Cemîle Turhalli ANF’î rê nirxnayîş kerd.

Cemîle Turhalli vat ke 27ê sibate gama dewrêka newîye nîşan da ke şerî herinda sîyasetê demokratîkî de ronana û na hewcekarîyêka lezabez bîye û wina va: “Vengdayîşo dîyin çarçeweya 'vengdayîşê pozîtîfî' de Birêz Ocalanî prosesî zaf sernuşteyan de girewt xo dest, hewanayîşê zemînê şerî, vurîyayîşê ci bi sîyasetê demokratîkî, luzumbîyayîşê peymana demokratîke, xurtkerdişê entegrasyonê demokratîkî û garantîkerdişê destûrî-huqûqî.”

Turhalli dîyar kerd ke sey serra varêne na mesele bi nêzdîbîyayîşê emnîyetî ameye destgirewtene la nika herinda înkarî de şinasnayîş, herinda asîmîlasyonî pawitişê nasnameyî û pênasekerdişê xo bi girêdayîşê etnik-dînî vejîyeno meydan û wina va: “Çareserîya destûrîye ganî bingeyê entegrasyonê demokratîkî ser o bi fehmê hemwelatîya azade bêro destgirewtene. Qanûnê haştîye sernuşteyêko muhîm o. Nasname û heqê ziwanî pawitişî û xurtkerdişê îdareyanê herêmkîya sernuşteyê bingeyin ê.”

Turhalli eşkera kerd ke entegrasyono pozîtîf dewlete rê berpirsîyarîya vurîyayîşê awanîye bar keno û huqûqêko ke kanalê muzakereyan akero û hemwelatîya seypêye esas bigîro, hewce keno û wina dewam kerd: “Birêz Ocalanî cinîyê sey îradeyo awanker tarîf keno. Wexto ke vat ganî hêzê komelê demokratîkî cinî biba, rasta zî vano ke ganî komelê komunalî de zî hêz û pêşengê ci cinî biba û cinîyî ganî rolê awankerdişî bigîra xo ser. Şorişê Rojawanî raya pêroyî ya dinya de sey şorişê cinîyan ame nirxnayene. Rojawan de xobawerîye, qerardarîye û wêrekîye seba zaf cinîyan cî çimeyê hêvîye."

Turhalli peynî de vat ke têkoşînê cinîyan Hindîstanî ra Ewropa, Amerîkaya Başûrî ra heta cografyayanê cîya-cîyayan xeta xoverdayîşê cihankîye viraşt û têgêrayîşê cinîyan ê kurdan nê prosesî de pêşengîye kerde.