Aydin de Komeleya Kultur û Hunerî ameye akerdiş

Vera polîtîkayanê asîmîlasyonî yê ke metropolan de kurdan ser o yenê rayraberdene, rojanê vîyarteyan de qezaya Koşkî ya Aydinî de Komeleya Kultur û Hunerî ya Azade ameye akerdiş. Xebatkarê komele ke akerdişê komele de qisey kerdî, dîyar kerdî ke komele serê waştişê şarî ameya akerdiş û venga cinîyan û şarê Aydinî kerdî ke tewrê atolyeyan bibê.

Sereka komele Belkisa Suleymanoglu eşkerakerdişê xo de dîyar kerd ke komele serê waştişê şarî ameya akerdiş û wina va: “Sey her kurdêko ke koçber bîyo, şarê tîya zî ziwan, kultur û hunerê xo ra dûrî kewtî. Verê cû xebatê winasî nêameyî rayraberdene. Na xebata ma serê waştiş û hewcedarîyanê şarî aver şîye. Ma 5-6 aşmî verê dest bi xebatan kerd. Ma ameyî yewser û şar zîyaret kerd. Ma kêfweş ê. Xebatanê ma netîce da. Hevalanê ma eleqeyêko pîl mojna. Cinî eleqeyêko zaf pîl mojnenê.”

Atolyeya kultur û hunerî

Belkisa Suleymanoglu wina dewam kerd: “Cinî her ware de wayîrê hêzêko awankerdox ê. Bi taybetî Aydin de potansiyelê cinîyan vejîya orte. Waştişê cinîyan ser o do atolyeyê tîyatro, erbane û govende dest pêbikerê. Ma bi nê sînordar nêmanenê. Hêvîya ma na ya ke xebatê ma bi hawayêkê xurtî dewam bikerê. Wa şarê ma wayîrê komele vecîyo.”

Vera asîmîlasyonî huner 

Xebatkara Temsîlkara Komeleya Kultur û Hunerî ya Koşkî ya Aydinî Rajîn Tanhan zî da zanayene ke kurdê ke Aydin de yê bi serran o bi asîmîlasyon û zextan dir yenê rî bi rî û wina dewam kerd: “Wexto ke ma komele akerd motîvasyonê ma ciwîyakerdişê kultur û ziwanê kurdkî bi. Ma zanê ke ma bi kulturê xo est ê. Wexto ke şarêk bêro çinkerdiş, ewilî kultur û ziwan ra dest pêkeno. Ma tîya vera çîyanê ke ameyî rî bi rî têkoşîn kenê. Ma komeleya xo akerd. Ma kêfweş ê. Ma do pîya hîna zaf xurt bibê. Semedo ke ma bi reng, ziwan û nasnameyê xo est bê, ma do têkoşîn bikerê. Ma veng danê heme kesê ke wazenê kulturê xo bidê ciwîyayîş. Ma heme kesî pawenê komeleya xo.”