Astronotê Artemis IIyî agêrayî Dinya

Kapsula Orionî ya ke makîneyê asmenî yê merdimin o yewin o ke NASA’yî badê 50 serran ra zêdêr wextî ra dima erşawit rêgeha Mengî, mîsyonê xo temam kerd û bi serkewtişî Okyanûso Gird ser o ronîşt.

Çar astronotê ke çarçewaya mîsyonê Artemis IIyî de dormeyê Mengî de vejîyayî raywanîyêka tarîxî ya ke nêzdîyê 10 rojî ramite, 11ê nîsana 2026î roja îneyî saeta herêmî 20:07 de (bi saeta Tirkîya 03:07) eyaletê California de verê San Diegoyî de ronîştî.

Merhaleyo tewr talukeyin ê raywanîye, kewtişê kapsula Orionî yê atmosferê Dinya bi. Kapsula ke bi lezêko ke lezê vengî ra 30 qatî zêdêr o kewte atmosfer, germîya rîyê ci yê teberî resaye nêmeyê germîya rîyê tîjî. Ame eşkerakerdene ke rewşa weşîya muretebatî ke Qumandan Reid Wiseman, pîlot Victor Glover, pîspora wezîfeyî Christina Koch û astronoto Kanadayij Jeremy Hansen ra yeno pê, “zaf rinda û stabîl a”.

Yeno paweykerdene ke muretebat, badê kontrolanê tibbîyan ê Merkezê Asmenî yê Houstonî ra peynîya nê hewteyî de keyeyanê xo reyde bêro têhet. Kapsula Orionî zî seba cigêrayîşê hûrgilîyinî do bêra berdene bi merkezê NASA’yî û seba wezîfeyê dima yê “Mengî ser o lîng ronayîşî” bêra amadekerdene.

Muretebat ra Victor Gloverî unvanê “sîyayo yewin o ke şîyo rageha Mengî”, Christina Koche unvanê “cinîya yewine” û Jeremy Hansenî zî unvanê astronoto “yewin o ke amerîkayij nîyo (kanadayij o)” girewtî. Astronotan 10 rojê raywanîye de 1 mîlyon û 100 hezar kîlometre ra zêdêr ray raşîyî. Ekîbo ke noqtayanê Mengî yê ke verê ci de bi çimê merdiman nêameyê vînayene fotografê ci antî, seba wezîfeyanê ronîştişê Mengî yê ameyoxî (Artemis III) dayeyê krîtîkî dayî arê.

Serekê DYA’yî Donald Trumpî, bi parekerdişêkê hesaba xo ya medyaya sosyale serkewtişê mîsyonî fîraz kerd. Trumpî wina vat: “Pêro raywanîye bêemsal bîye, ronîştiş bêuqisûr bi. Sey yew Serekê DYA’yî ez nê eşkayêne nê ra zêdêr sereberz biba.” 

Trumpî heto bîn ra astronotî seba serkewtişanê înan dawetê Qesra Sipîye kerdî.