Abdullah Ocalan: Çarçewaya qanûnî eşkeno bingeyê prosesî awan bîkero

Heyetê Îmralîyî yê DEM Partî yo ke parlamentera Wanî Pervîn Buldan, parlamenterê Rihayî Mîthat Sacar û endamê Buroyê Huqûqî yê Seserrî Faîk Ozgur Erolî ra yeno pê, vizêr Girawa Îmralîyî de Rayberê Şarê Kurdî Abdullah Ocalanî reyde pêvînayîş kerd. No pêvînayîş di aşman ra pey ame kerdene. Heyetî derheqê nê pêvînayîşî de eşkerayîyêka nuştekî vila kerd. Eşkerayî de ame vatene ke înan vizêr Girawa Îmrali de Rayberê Şarê Kurdî Abdullah Ocalan û embazanê ey reyde pêvînayîş kerdo. Erjnayîşê Rayberê Şarê Kurdî Abdullah Ocalan yê nê pêvînayîşî ser o eşkerayî de ameyê parekerdene.

Erjnayîşê Rayberê Şarê Kurdî Abdullah Ocalanî wina yê:

“Komelê ke wayîrê hêrsêko gird ê, bê fikir û erjanê etîk nêeşkenê bêrê bedilnayene. Komel her asta cuye de hetê etîk, sîyaset, huqûq û ekonomî ra rastê yew xetimîyayîşêko gird yeno. O semed ra ma nê prosesî de bi îsrar ê û lez kenê.

Ez fîkirîyena ke konjonkturê Rojhelatê Mîyanênî seba her çî rê akerde yo. Dewletê sey Îsraîl û Îranî huşk benê û wina aseno ke do hîna zêde zî huşk bibê. Rojhelatê Mîyanênî de xurtkerdişê netewperestî, yewbînan ra cîyakerdiş û xurtkerdişê netewperestîya tenge zerar dano. Ma seba averşîyayîşê rîskanê herêmî ke dewam kenç, vernîya înan bigîrê û hesabanê bi gonî bivîyarnê, xebatêka prosesî kenê. Helbet o muhîm no yo ke her çîyo ke ameyo kerdene, bi qanûnan eşkeno bêro garantîkerdene. Pawitiş, wezîyetê pawitişî de mendiş tena rîskan ano meydan. Wextê ma yo ke ma vîndî bikerê çin o. Ez bawer kena ke pêro aktorî bi nê mesulîyetê tarîxî hereket bikerê û Meclîs zî xebatanê xo bi nê hesasîyetî rayra bera.

Çarçewaya qanûnî eşkeno bingeyê prosesî awan bikero. Sererastkerdişê qanûnan, prosesê awankerdişê pozîtîfî û demokrasîyî keno rasteqîn. Demokratîkbîyayîş lazimtyêka bingeyîn a û serkewtişê nê prosesî ma nêzdîyê nê amancî keno.

Gelo kewtişê bi zor yê zereyê merkezê pêroyî yê yew partîya sîyasî ya ke berê ci bi balyozan şikitiş, goreyê sîstemê demokrasîyî yo? Hedîse û averşîyayîşê ke vera Partîya Şarî ya Komarî (CHP) bîyî, pêro pîya rîyê çinbîyayîşê sîyasetê demokratîk û demokrasîyo rasteqînî ra  yo. Sebebo ke rewşe arde na asteî, bêparbîyayîşê demokrasîyî yo ke bingeyê komarî de yo. Bi çimê yew luks, yew demagojî yan zî vatvatokêk ewnîyayîşê demokrasîyî û şenikvînayîşê ci, xetayêka zaf giran û muhîm a. Tu rewşêka winasî çin a ke qandê pênaseyê demokratîk ê komare lezgîn bo.

Ma nê welatî de, seba nê bingeyî aver berê û îmkananê ci pîl bikerî xebitîyenê. Îmrali de wexto ke ma seba çareserîye ver bi gamanê huqûqî şonê, amadekerdişê komare seba vejîyayîşo demokratîk û huqûqo demokratîk zaf muhîm vînenê. Ma nê zî sey yew gamêk vînenê ke kêmaneya demokrasîyî zereyê partî û mîyanê partîyan wedarîyo. Gerek hemverê heme cehdan; resnayîşê komare yê bi tedeyî û kulturêko demokratîk û awankerdişê sîstemêkê saxlem ê huqûqî wezîfeyêko sereke bo. Nê bingeyî ser o ez veng dana her kesî ke piştgîrî bidê prosesê Aştî û Komelê Demokratîkî.

Manayê entegrasyonê kurdan seba komara demokratîk no yo. Ma wazenê rewşêka ke babeta kurdan bi serran o rîyê meseleyê kurdî ra asê menda, derbas bikerê. Hêmanê şîdetî yo ke semedê meseleyê kurdî ra yeno, sîstemêkê çareserîye reydde yeno vîyartene. Nê prosesî ra ma eşkenê vajî prosesê newera biserûberkerdiş, newekerdiş û modernîzekerdişê têkilîyanê tirk û kurdan.

Mesajê roşnvîr û akademîsyenanê mîyanneteweyîyan ê ke piştgîrî danê prosesê Aştî û Komelê Demokratîkî, kerdê kitab. Na çarçewa de ez wazena vaja ke ez amade ya ke her tewir pêşnîyar, rexne û piştgîrî her hetî ra bi hawayêko xorîn bierjna. Nê wextê de ke laizmtîya ma zaf zêde bi aştî û demokrasiyî est a, seba piştgîriya înan a zaf muhîme ez hemînan silam kena.”